Nutarterinermik sanaartugassanillu suliassat immikkut ittut suliffissanik pilersitsissapput

Naalakkersuisut tamarmiusut sanaartugassat nutartitagassallu immikkut ittut aallartisarnissaannut 174,2 mio. koruuninik Aningaasaqarnermut ataatsimiititaliamut sapaatit-akunnerata tulliani qinnuteqarniarput.
 
Naalakkersuisut neriuutigaat taamatut suliniuteqartoqarneratigut suliffissaaleqineq malunnaatilimmik appartinneqarsinnaassasoq, naalakkersuisut tusagassiorfinnut nalunaaruteqarlutik taama allapput.

Taamatut suliniuteqarneq suliaqarfinnut assigiinngitsunut arlalinnut agguataarneqassaaq, soorlu peqqissusermut, ilinniartitaanermut, ineqarnermut attaveqarfinnullu. Taamatuttaaq nunamut tamarmut siammartinneqassaaq, sumiiffinnut suliffissaaleqisoqarnerpaasunut sammitinneqassalluni.
 
- Suliniutit pilersaarutigisat naammassineqannginnerisigut sanaartornermut iluarsaassinermullu aningaasaateqarfimmi aningaasat amerliartuaarsimapput, inuussutissarsiornermut naalakkersuisoq Jens-Erik Kirkegaard oqarpoq, ilanngullugu oqaatigaa sanaartornermi manna tikillugu periuserineqartoq allanngortinneqassasoq, sanaartornermi suliniutit aningaasanut inatsimmi takuneqarsinnaasut ukiuni ataasiakkaani piviusunngortinneqartarnissaat qulakkeerniarlugu
 
Tusagassiorfinnut nalunaarummi sanaartornermi suliniutinik tigussaasunik allaqqasoqanngilaq, kommunilli killeqarfii akimorlugit sulisussarsiornermik oqilisaasussamik nuna tamakkerlugu suliffinnut nittartagaq akeqanngitsoq ilaatigut eqqaaneqarpoq.

Sulianik ilinniarfinnut ilassutitut aningaasaliinikkut aatsitassarsiornermi takkuttussami nunatsinnit sulisartut
sapinngisamik amerlanerpaat suliffeqalernissaat aamma isumannaarniarneqarpoq.
 
Aammattaaq sulisartut nunap avataaneersut sulinissamut najugaqarnissamullu akuersissutinik pigisaqarnersut nalunaarutigeqqaagaanngitsumik ornigulluni nuna tamakkerlugu misissuisarnerit Naalakkersuisut eqqunniarpaat.
 
Anguniagarlu pingaarneq tassaavoq suliffissaaleqinerup 2017 nallertinnagu affaannanngortinnissaa, Naalakkersuisut taama allapput.