Nunavumi nannunik aamma ajornartorsiuteqarput
Canadami meeqqat sapaatip akunnerata siuliata naanerani illumit illumut mamakujuttussarsiorlutik Halloweenisiorput.
Nunaqarfimmili Arviatimi nanoqarpallaarnera pissutigalugu meeqqat aninissaannut ulorianarpallaarpoq, taamaattumillu katersortarfimmi isersimasariaqarsimallutik.
Nunatsiaq News naapertorlugu, Nunavut inatsisartuinut ilaasortaq, Joe Savikataaq, Canadami avatangiisinut ministerimut, Johnny Mikemut nannuttassiissutit ikippallaarnerarlugit maalaaruteqarluni sapaatip akunnerata siuliani allagaqarpoq.
AAMMA ATUARUK Illoqarfinni nanoqarnerulissasoq WWF-ip naatsorsuutigaa
Hudsonip Kangerliumarngata kippasinnerusortaani Nannut pisarineqarsinnaatitaasut maanna 28-iupput. Nunavulli uumasut nujuartat pillugit allaffeqarfiata nannuttassiissutit qaffanneqarnissai, nannullu 38-it pisarineqarsinnaanngortinnissai, innersuussutigaat, tamannali avatangiisinut ministerimit itigartinneqarpoq.
Taamaammat Arviatimi ilaatigut Pinngortitaq pillugu nunnarsuaq tamakkerlugu suliniaqatigiiffiannit akilersorneqartumik, nannunik decembarip naanissaata tungaanut nakkutilliisoqassaaq.
Nannulli Arviatimiinnaanngitsoq ajornartorsiutaapput. Hudsonip Kangerliumarngata kippasinnerusortaata inoqarfiani tamanna aamma ajornartorsiutaavoq.
Tamannalu ajornartorsiutigigallarneqarnerani meeqqat katersortarfinni ullorsiortariaqartassapput.
