Illoqarfinni nanoqarnerulissasoq WWF-ip naatsorsuutigaa

- Ittoqqortoormiini ullut tamangajaasa nanoqartarpoq. Taamaammat nakkutilliisoqarnissaq pisariaqarluinnarpoq, Pinngortitaq pillugu nunarsuaq tamakkerlugu suliniaqatigiiffimmeersoq, Kåre Winter Hansen KNR-imut oqarpoq.

Taamaammallu nannut illoqarfimmit qimagusimanissaat anguniarlugu namminneq akilikkaminnik suliniuteqarput.

Namminnerlu tamanna akilernissaat pissusissamisoortoq, suliniaqatigiiffimmit isumaqartoqarpoq.

- Ittoqqortoormiini ajornartorsiutit nutaajuvoq, ukiummi marluk pingasullu missaannaanni nanoqartareerpoq. Namminersorlutik Oqartussat taama nakkutiginninnissaminnut aningaasassaaleqisut nalileratsigit, ikiuiniarluta iliuuseqarpugut, nannut innuttaasullu illersornissaat anguniarlugu, Kåre Winter Hansen oqarpoq.

Aamma atuaruk Nannut Ittoqqortoormiit illoqarfiannut pisartut amerlapput

Nannuttassiissutit aasakkut nungunneqareeraangata, imarlu sikukikkaangat, nannut nerisassarsiorlutik illoqarfimmukarnerusartut, taanna oqarpoq.

Ittoqqoortoormiinnaanngitsoq

Immallu sikuerukkiartornerata malitsigisaanik nannut illoqarfinnukarnerusalernissaat Kåre Winter Hansenip ernumassutigaa.

- Ajornartorsiutaangaatsiarneranik naliliissagutta illoqarfinni allani nannunik nakkutilliineq atuutilernissaa eqqarsaatigissavarput, Hansen oqarpoq, ilanngullugulu oqarluni Pinngortitaq pillugu nunarsuaq tamakkerlugu suliniaqatigiiffiup ukiup tulliani nakkutilliisoqarnissaanut akiliiumaartut qularinagu.

- Nakkutilliisoqassanngippat inuit saassutsinnissaminnut navianartorsiornerulissasut, nannullu amerlanerujussuit aamma toqutaassasut uanga ernumassutigaara, Kåre Winter Hansen oqarpoq.

Nannunik nakkutilliineq oktobarip naanerata tungaanut ingerlanneqassasoq naatsorsuutigineqarpoq.

Aamma atuaruk Kiisa itsuannisaaginnarlutik nannunniartalerput