Nunatta tunngiviusumik inatsiseqalernissaanut isumalioqatigiissitaq pillugu siunnersuut tuaviussaasoq

- Tunngaviusumik inatsisiliornissaq pillugu isumalioqatigiissitap najoqqutassaasa, Nunatta ineriartornissaanut tunngaviusussat sapaammi ualimi ataatsimi suliarineqarnissaat ilumut oqassaguma ernumanartoqartippara, Demokraatineersoq inatsisinullu ataatsimiititaliami siulittaasup tullia, Michael Rosing oqarpoq.

Ataatsimiititaliarlu aqagu sapaammi ulapittussaassaaq. Naalakkersuisut tunngaviusumik inatsisiliornissamut isumalioqatigiissitamik tunngaviusumik inatsiseqalernissamut siunnersuusiortussamik pilersitsinissamut najoqqutassaannik ataatsimiititaliaq ataasinngornerutinnagu saqqummiussissaaq.

Kalaallit tunngaviusumik inatsisissaq inuiaqatigiinni tunngaviliinerpaajussasoq, Naalakkersuisut allaaseraat.

Rosing: Nangaanartoqarpoq

Inatsisartut siunnersuut pillugu tuaviortumik ullumi qaaqquneqarput, inatsisinullu ataatsimiititaliamut ilaasortat najoqqutassaliornissartik sapaatiuppat aallartissavaat. Suliat assingusut sapaatit akunnerini arlalinni qaammatiniluunniit suliarineqartaraluarput, inatsisinut ataatsimiititaliaq Naalakkersuisunut apeqquteqartarmat. Naalakkersuisullu apeqqutigineqartut misissortarpaat, ataatsimiititaliamullu akissuteqartarlutik.

- Suliaq pingaaruteqarluinnartoq Inatsisartuni partiit amerlanerit isumaqarmata, inatsisinut ataatsimiititaliap peqqissaartumik suliassaata sapaammi ualermi ataatsimi suliarineqarnissaa nangaanartoqartippara, Michael Rosing oqarpoq.

Aamma atuaruk Kalaallit Nunaanni inatsisinut tunngaviusussanut isumalioqatigiissitaq 2017-imi pilersinneqarniartoq

Inatsisinullu ataatsimiititaliap suliaa isumalioqatigiissitassamut pingaaruteqarpoq.

- Naalakkersuisut isumalioqatigiissitaliornissamut piginnaatitaaffeqalerpata uagut aalajangikkagut aallaavigalugit sulissapput, Michael Rosing oqarpoq.

Nassuiaat tallimanngormat tunniunneqartoq

Nassuiaat ataatsimiititaliamit isummerfigineqartussaq hunnorujungajannik quppernilik Inatsisartunut ilaasortat aatsaat ippassaq unnukkut atuarsinnaanngorpaat.

Aamma atuaruk Kalaallit Nunaanni inatsisinut tunngaviusussanut isumalioqatigiissitamik pilersitsinissamut nalunaarusiaq

Inatsisartut siornatigut kissaataat nanginneqarmat siunnersuut nutaamik imaqanngitsoq, Namminersornermut naalakkersuisup, Suka K. Frederiksenip oqaatigaa.

- Sukkasuumik peqqissaartumillu ilaannikkut sulisinnaasariaqarpugut, taava inatsisinut ataatsimiititaliap sumik saqqummeerusunnersunnerluni nalilissavaa, Suka K. Frederiksen Inatsisartut ataatsimiinneranni oqarpoq.

- Nutaartaqanngilaq, namminersornermullu naalakkersuisoqarfik pilersinneqarmat tassani pisoqartariaqarpoq, Suka K. Frederiksen oqarpoq.

Partiit tamarmik Demokraatit pinnatik oqallinnermi siunnersuummut tapersiipput.