Nukiga danskit aningaasanut inatsisissaannit aningaasaliiffigineqartoq
Peqatigiiffik kulturikkut suliniuteqartoq ”Nukiga” kultureqarnermut ministereqarfimmut 34 millionit koruuninik kissaateqaraluarpoq – annikinnerusulli aamma nuannaarutigineqarsinnaapput.
Kalaallit Illuutaanni pisortaq, Nukigamilu suliniuteqartoq, Jørn Holbech taama oqarpoq.
- Nutaarsiassatsialaavoq suliniutigisimasarput. Aallarteqqaaratta oqarpugut, pilersaarusiussaagut taakkulu aningaasassaqartinneqassapput. Tamannalu nuannaarutigiinnassavagut.
AAMMA ATUARUK Kalaallit Illuata Nunatsinnit oqaluttuat nutaat pilersinniarpai
Aningaasanik pissarsisussat arlariinneri nalornissutaasoq
Danskit naalakkersuisuisa Dansk Folkepartiillu danskit aappaagumut aningaasanut inatsisissaat tallimanngormat isumaqatigiissutigaat.
Isumaqatigiissummi suliniut Nukiga ukiuni pingasuni 2,1 millionit koruuninik taperserneqartoq allassimavoq.
Danskit aningaasanut inatsiisaat naapertorlugu aningaasat ”Kalaallit Illuutaanni kulturikkut suliniummut Nukigamut” atorneqassapput.
Kalaallillu Danmarkimi illuutaasa sisamat akornanni aalajangersimasumik suliniut taanna pillugu ullumikkut suleqatigiittoqanngilaq. Taannalu maannakkuugallartoq taamaallaat Kalaallit Illuannit Aarhusimiittumit ingerlanneqarpoq.
Aningaasalli taakku kissaatigisatulli sulisunut sisamanut tallimanulluunniit naammanngikkaluartut suliniut kalaallit illuutaanut allanut siammarterneqarnissaa Jørn Holbechip kissaatigaa.
AAMMA ATUARUK Kalaallit Illuata Nunatsinnit oqaluttuat nutaat pilersinniarpai
- Kalaallit Nunaannit oqaluttuatsialaat nutaat samminissaat uagut anguniagaarput. Tamatumalu Kalaallit Illuanit Aarhusimiittumit aningaasalernissaa taperserneqarneralu iluatsilluarsimasoraara. Pilersaarulli imaattuaannarpoq, suliniuteqarneq illoqarfimmiiginnaraluartoq nuna tamakkerlugu taama suliaqalernissa soorunami kissaatigaarput, Jørn Holbech oqarpoq.
Aningaasalli taakku 2,1 millionit koruuniusut sumorpiaq atorneqarnissaat suli nalunartoq, Jørn Holbechip oqaatigaa.
Tamanna Nukigami kalaallillu illuutai allat peqatigalugit oqaluuserineqaqqaassaaq.
AAMMA ATUARUK Kalaallit Illuutaat Aarhusimiittoq kultureqarnermut immikkoortortaqarfittaartoq
Danskit aningaasanut inatsisissatut isumaqatigiissutaanni Danmarkimi meeqqat atuarfiini angajulliit inuusuttutullu atuarfianni atuartut akornanni Kalaallit Nunaat pillugu ilisimasaanik misissuinissamut 500.000 koruunit immikkoortinneqarput.
Aningaasanulli inatsit Folketingimit akuerineqaqqaassaaq. Ministeriunerup Lars Løkke Rasmussenip tamanna Folketingip juullikkunni sulinngiffeqalinnginnerani piumaartoq neriorsuutigaa.
AAMMA ATUARUK Halv million sat af til at undersøge viden om Grønland
