Nunatsinni qallunaatsiaat kigartuillutik allattarsimaqaat
-Inuuninni naammassisatit pilluaqquneqarlittoq. Taama qisuminerni qiperorlugit runinik allataq aasaq Igalikumi nassaat ilaanni allassimasoqarpoq.
Qallunaatsiaat tikiunneraniit qimagunnissaata tungaanut runinik allallutik kigartuijuarsimapput, allatamerngillu katillugit 170-it nunatsinni nassaarineqareerlutik. Danmarkip Katersugaasivissuani ilisimatuut ilaat Lisbeth Imer runit nunatsinni nassaarineqarsimasut tamarmik misissugaralugit nalunaarsorlugillu aallartippai, aappaagulu atuakkiornissani siunniussimallugu.
Atuakkiarisassaa 2014-ip aallartinnerani saqqummerumaarpoq. Lisbeth Imer-ip naatsorsuutigaa allatamerngit tuusintilikkaat Kalaallit Nunaanni suli nassaarineqarumaarut.
- Kalaallit Nunaanni qallunaatsiaat nunagisimasaani sumiluunniit assaallatsiaraanni runinik kigartorlugit allatat saqqummertaraat. Tassa qallunaatsiaat akornanni allaqatigiinneq takornartaasimanngilaq. Assigiinngitsorpassuarnik siunertaqartillugit runinik allattuineq pisarsimavoq, upperisamulli tunngasut takussaanerpaajupput, tassami runit atorlugit qinnutimerngit takussaanerisa saniatigut runit atorlugit aarnualiat aamma nassaassaapput, aarnussammi taakku nappaatinut pakkersimaarinnittussatut eqqarsaataasarsimapput, Libeth Imer oqarpoq.
Kalaallit Nunaanni runit nassaarineqartut sumi tamaani nassaassaanerat immikkoorutigaat - tassami nunaqarfinni minnerpaani naasorissaasut illuini mikinerpaani aamma runit nassaarineqartarmata.
- Europami pissutsit qimerluussagutsigit runit atorlugit allatat qaqutigooqaat, naasorissaasummi Europamiut atugarisuusimannginnamikku. Kalaallilli Nunaanni qallunaatsiaat allannissamut kuussaasimanngeqaaq, asulu suulluunniit nunamut matoorussaappata qaqugumorsuaq asiunatik atajuassasut, taamaammallu suli nassaassaqarnera qularisassaanngilaq, Lisbeth Imer oqarpoq.
Ilisimatusarnermut suliniut ’Nordlige Verdener’ ilisimatusarnermi inerneri Danmarkip Katersugaasivissuani ulluni makkunani saqqummiussuunneqaleruttorput, suliniullu Kalaallit Nunaanni Runit ilisimatusaatigineqartunut akuummat saqqummiuneqartunut akuuvortaaq.
