Nunatsinni piginneqatigiiffissuit droninik nakkutilleeqataassanngitsut
Nunatsinni suliffeqarfinni annerpaat marluk, Air Greenland aamma Royal Arctic Line, Kalaallit Nunaanni Savalimmiunilu nakkutilliinerunissamut isumaqatigiissutissaq malillugu nakkutilleeqataassanngitsut paasinarsivoq.
Tassa imaappoq, piginneqatigiiffiit droninik, tassa timmisartuaqqanik ungasianiit aquttakkanik nakkutilliisooqataassanngillat. Nakkutilliinerunissamut aningaasaliissutit katillutik 1,5 milliardit koruunit 2023 ilanngullugu atugassat affaat droninik nakkutilliinermut atussapput.
1,5 milliardit koruuninik Issittumi nakkutilliinerunissamut aningaasaliineq
Folketingip illersornissaq pillugu isumaqatigiissutitaaq 2018-imi akueraa. Saniatigut 4,8 milliardit koruuninik Illersornissaqarfimmut 2023-p tungaanut aningaasaliinissaq isumaqatigiissutaavoq.
Partiit illersornissaq pillugu isumaqatigiissusiortut sualummik Atlantikup Avannaani Issittumilu 2023-p tungaanut nakkutilliinerunissamut saniatigut 1,5 milliardit koruuninik 2019-imi aningaasaliipput. Aningaasat taakkua qanoq agguarneqassanersut isumaqatiginninniutigileruttorpaat.
Danskit naalakkersuisui Socialdemokratit, Venstre, Konservative, Liberal Alliance Radikale Venstrelu illersornissaq pillugu 2018-imi isumaqatigiissusiortut isumaqatiginninnialeruttortuupput.
Folketingimi ilaasortat nunanit avannarlerneersut isumaqatiginninniaqataanngillat. Isumaqatiginninniarnerilli Naalakkersuisullu ataqatigiissarneqartut, danskit sillimaniarnermut ministereqarfiat ilisimatitsivoq.
Air Greenland Illersornissaqarfiup droninik nakkutilliinermi pisariaqartitaanik naammassinnissinnaanngitsoq, danskit illersornissamut ministeriat Trine Bramsen (S) KNR-imit apersorneqarami oqarpoq.
- Nakkutilliinermi suliassani aalajangersimasuni ikiuussinnaanngillat. atortussanik useqarpallaassaqisut, taanna oqarpoq.
AAMMA ATUARUK Illersornissaq pillugu isumaqatigiissut nutaaq: Nunarput nammineq illersornissamik ilinniarfeqalissasoq
Illersornissaqarfik droninik marlunnik kilometerit 500-tut isorartutigisukkoorsinnaasunik pisissangavoq. Taakku qanoq ittuunissaannik misissuisoqaqqaassaaq.
Air Greenland timmisartunik Dash-8-nik nakkutilliisooqataanissamik aamma neqerooreeraluarpoq. Piginneqatigiiffiulli taassuma atortui Illersornissaqarfiup pisariaqartitaanut aamma naapertuutinngillat.
- Timmisartut Dash-8-t tamatumani suliassanut naapertuutinngillat, Trine Bramsen KNR-imut oqarpoq.
Air Greenlandili Illersornissaqarfillu assartuinermi suleqatigiinnerulissasut, isumaqatigiissutissap immikkoortuisa ilaanni allaqqavoq. Assartuinermili suleqatigiinneruneq sunerpiaq ilaqarnersoq, illersornissamut ministereqarfiup ilisimatitsissutigisinnaanngilaa.
Timmisartuussileqatigiiffik Air Greenland danskit naalagaaffiallu Illersornissaqarfiup qulimiguullit marluk immami annaassiniarnermut upalungaarsimanermut atugassai pillugit ukiorpaalunni atuuttussamik isumaqatigiissuteqaqqammerput.
Aamma Illersornissaqarfik Air Greenlandilu naammagisimaarnaqisumik suleqatigiittut, Trine Bramsen oqarpoq.
- Air Greenland Illersornissaqarfiup suleqatigisaatut pingaaruteqaqaaq. Taamaammat suleqatigiilluarnissarput kissaatigaarput. Isumaqarpungalu suleqatigiilluartugut. Qulimiguullit annaassiniutit assersuutissaqqipput. Taamaammat Air Greenland unnersiutigiinnarsinnaavara.
Illersornissaqarfiup umiarsui mikisunik droneqassasut
Partiit isumaqatigiissusioqataasut Kalaallit Nunaanni suliffissuit tapersersorusukkitsik nunaqavissunullu suliffissaqartitserusullutik, isumaqatigiissutissami allaqqavoq.
60 millionit koruunit droninut mikisunut umiarsuarniit aquttagassanut aamma atussapput. Nunatsinnili umiarsuit soorlu Royal Arctic Linep umiarsui, aamma atorneqassanngillat. Illersornissaqarfiup umiarsui kisimik droninik nakkutilliinermut atussapput.
- RAL-ip umiarsui suliassamut tamatumunnga naapertuutinngillat, Trine Bramsen oqarpoq.
USA-mit oqaloqatereerlutik Naalakkersuisut Savalimmiunilu naalakkersuisut peqatigalugit isumaqatigiissusiorput. Isumaqatigiissutissarli Savalimmiuni Kalaallit Nunaannilu oqartussanit aatsaat akuerineqareerpat atuutilissaaq.
