Nunatsinni aarsaartartut kattuffiliortut
Nunatsinni aarsaartartut 1998-imi aallartikkamilli Danmarkimi kattuffiup ataaniissimapput. Nunatsinnilu kattufiliornikkut namminerisaminnik peqatigiiffeqalerput. Suliniuteqartuusut tassaapput aarsaartartut pingasut Max Petersen, Ulf Davidsen aamma Thorlak S Nielsen.
Taakku Danmarkimi Sanaartornermut Angallannermullu Aqutsisoqarfik suleqatigalugu Nunatsinni aarsaartartunut atuagaaqqamik malitassamik suliaqarsimapput. Atuagaaraq ilitsersuinermik malittarisassanilu atuuttunik pingaarutilinnik imaqarpoq. Danmarkimi aarsaartartunut atuagaaraq malitassaq nunatsinni aarsaartartut maannamut najoqqutarisariaqarsimavaat.
Najoqqutassiarli Danmarkimi pissutsinut naleqqussarneqarsimasoq Nunatsinni atussallugu ajornakusoorsimavoq. Danmark nunaarannguuvoq qaqqaqanngitsoq timmisartunillu angallavigineqartupilussuaq, tamannalu Nunatsinnut qaqqartuumut timmisartunillu angallavigineqarpianngitsumut naleqqiullugu allaaneroqaaq, peqatigiiffik tusagassiorfinnut nalunaarutimini taama allappoq.
Kattuffik aarsaartartunik pikkorissartitsisarniarpoq, silasiornermik, atortorissaarutit misissornissaanik, aerodynamikkip pissusianik kiisalu ajutoornermi ikiueqqaarnermik. Nuummi peqatigiiffik arlalinnik ilinniartitsisussaqareerpoq, pilersaarutillu malillugit nunatsinni sumiiffinni allani aamma peqatigiiffiliortoqassaaq, taamaaliornikkut amerlanerusut aarsaarnermik ilinniartitsinissamut piginnaaneqalersikkumallugit.
Kattuffittami siulersuisut maanna nittartagaliortussanngorput, suleriaasiorlutik, atuagaaqqamik nutarteralutik, aningaasaliisussarsiorlutik kattuffimmillu ingerlatsinermut tunngasunik allanik suliaqarlutik.
Aarsaarneq, paragliding, timersuutaavoq nakkariartuummut eqqaanarsinnaasumik aarsaaruserluni ingerlanneqartartoq. Innaarsunnit qaqqaniillu qangattarsartoqartarpoq aammaali biilimit kalinneqarluni qangattarsartoqarsinnaasarluni.
Danmarkimi timersuut Dansk Hangglidingip Paragliding Unionillu ataaniippoq, aarsaartartullu nunatsinneersut siornatigut taakkunani ilaaasortaasimapput.
