Akissaatit pillugit isumaqatigiissutip peerneqarnissaa Sara Olsvigip piumasarigaa
Naalagaaffimmi tjenestemanditut atorfilinnut Kunngeqarfimmi ataasiinnarmik isumaqatigiissuteqartoqarnissaa piumasaraa.
- Suliat assigiitsillugit akissarsiat assigiittariaqarnerat pisusissamisoorpoq. Tamannalu danskit naalakkersuisuinut aaqqiivigeqqullugu sakkortuumik noqqaassutigaara, Naligiissitaanermut inatsisinillu atuutitsinermut naalakkersuisoq Sara Olsvig KNR-imut taama oqarpoq.
AAMMA ATUARUK Assigiimmik akissarsiaqartitsinissaq politikerit qulakkeertariaqarpaat
Akissaatit pillugit isumaqatigiissutip, Nunatsinni naalagaaffiup ataani tjenestemanditut atorfeqartunut ullumikkut immikkut atuutsinneqartup atorunnaarsinneqarnissaanik kissaateqarluni, Nunatsinni eqqartuussiveqarnermi pissutsit pillugit Folketingimi sisamanngornermi tusarniaasoqarnerani saqqummiussaqarpoq.
Tjenestemanditut atorfillit sumi najugaqarnertik suminnaanneernertillu apeqqutaatinnagu akissaatit pillugit isumaqatigiissut ataaseq tunngavigalugu atorfeqartinneqartariaqarput, Olsvig taama isumaqarpoq.
Sumi inunngorsimaneq tunngavigalugu akissaasersuineq atorunnaarsinneqareerpoq
Naalagaaffiup sulisoqarnermut, akissarsianut soraarnerussutisianullu aqutsisoqarfiata, Moderniseringsstyrelsip, CO10-llu, Nunatsinni pisortat suliffeqarfiutaanni atorfillit suliatigut peqatigiiffii arlallit sinnerlugit isumaqatigiinniartitaasup, akissaatit pillugit isumaqatigiinniarnerisa ukiuni marlunni paamaarunneqarnerisa kingorna sammineqartoq oqallisaaqqilerpoq.
Nunatta Politiivini Pinerluttunillu Isumaginnittoqarfiup ataani atorfeqartinneqartut matumani ilaatigut pineqarput. Isumaqatigiissut nutaaq pilersaarutit malillugit 2015-imi atuutilersinneqartussaagaluarpoq, taannali suli kinguaattorutigineqarpoq.
AAMMA ATUARUK Politiit amerlanerpaartaat najugaqavissuusut
Naalagaaffiup sulisuisa "sumi inunngorsimaneq tunngavigalugu akissaasersorneqarnerat" 1991-imi atorunnaarsinneqartoq Sara Olsvigip innersuussutigaa. Taamaammat matumani suliap danskit naalakkersuisuinit misissorneqarnissaa maanna noqqaassutigaa.
- Akissaarsersuinikkut naligiinngisitsineq pappiliatigut atorunnaarsinneqareeraluarpoq, politiinulli pinerluuteqarsimasunillu inissiisarfinni sulisunut suli atuutsinneqarpoq. Tamannalu danskit naalakkersuisuinut ullumikkut saqqummiuppara, Sara Olsvig taama oqarpoq.
Danskit inatsisinik atuutitsinermut ministeriat Søren Pape Poulsen suliaq pillugu oqaloqatigeqqinniarlugu oqaatigaa.
