Politiit amerlanerpaartaat najugaqavissuusut

Nunatsinni politiit atorfeqartut amerlanerpaartaat Nunatsinneersuusut kisitsisit nutaat takutippaat.
Politimester Bjørn Tegner Bay
Politimester Bjørn Tegner Bay Assi © : Jonas Fievé/KNR
Allattoq Kenneth Elkjær
februaarip 16-at 2017 12:46

Nunatsinni Politiinit 329-iusunit quliniit qulingiluat sinneqartut Nunatsinni ’najugaqavissutut’ nalunaarsoqqapput.

Politiini sulisut najugaqavissutut nalunaaqqasut Nunatsinni akissarsiat pillugit isumaqatigiissutit malillugit akissarsiaqarput, danskillu tikisitat Danmarkimi ilinniarsimasuunertik peqqutiginerullugu danskit isumaqatigiissutaat malillugu akissarsiaqartut, Nunatsinni politiit nalunaarutigaat.

Nunatsinni Politiit erseqqissarpaat, naatsorsueqqissaarnerni sulisutik sumi inunngorsimanersut sumiuunersulluunniit allassimanngitsoq. Kalaaleq politeeq Danmarkimi ilinniarnikuusimasinnaavoq taamaalillunilu tikisitatut nalunaarsoqqalluni.

Politiinili pisortanut najoqqutakkuminartoq malillugu piumasaqaateqarpoq pisortanngornerminni Nunatsinni isumaqatigiissutit malillugit akissarsiaqartinneqassasut, tamanna Danmarkimi ilinniagaqarsimagaluarunilluunniit atuuppoq.