Nunarput ebolamut upalungaarsimavoq

Dronning Ingridip Napparsimmavissua sukkulluunnit ajutoornissaq ingalassimatinniarlugu upalungaarsimavoq.

- Taamannak pisoqassagaluarpat, piumasaqaatinut naapertuuttunik ineeqqamik immikkoortitsiveqarpugut,  Nunatta nakorsaanera, Flemming Kleist Stenz, oqarpoq.

Nunattali nappaammik ebolamik eqqugaanissaa ilimananngitsoq, Kalaallit Nunaanni nakorsaaneq, Flemming Kleist Stenz, erseqqissaavoq.

- Erseqqissaatigissavara Europap nappaammik ebolamik eqqugaanissaa ilimanaatikeqimmat, taamaammallu nunatta aamma eqqugaanissaa ilimanaatikilluni, Nunatta nakorsaanera, Flemming Kleist Stenz, oqarpoq. 

Taassuma ilanngullugu oqaatigaa, nappaammik ebolamik tunillatsissimasut Nunatsinnukarsinnaanngimmata.

- Afrikap kitaani kalaaleq tunillatsissimappat ingerlaannaq nunatsinnukarsinnaanngilaq. Tassami angalaqattaaqqaartussaavoq soorlu Londonimut Düsseldorfimulluunniit, ingerlaannarlu nunani taakkunani suliarineqapallalluni. Kalaaleq Danmarkimiitilluni nappaatip ersiutaanik takussutissaqaleruni, taava Nunatsinnukaqqusaanavianngilaq, Flemming Kleist Stenz oqarpoq.