URANI Nunarput Danmarkilu uranisiornissamik aqqutissiuussinerarlugit IA Avatarlu isornartorsiuisut

“Kalaallit Nunaata uranisiorfiulernissaa pillugu innuttaasunik taasititsisoqarnissaa piumasaraarput”.

Aviisimi Politikenimi ullumi saqqummersumi allaatigisaq taama qulequtaqarpoq. Allaatiginnittut tassaapput folketingimut ilaasortaq Inuit Ataqatigiinneersoq Aaja Chemnitz Larsen aamma avatangiisinik illersuiniaqatigiiffimmi Avatami siulittaasoq Mikkel Myrup, Danmarkimi partiinit arlalinnit aammalu  pinngortitamik avatangiisinillu illersuiniaqatigiiffinnit arlalinnit taperserneqartoq.

Allaatiginnittut Kuannersuarni uranimik piiviaavissaq pillugu suliamut tunngatillugu Nunatta Danmarkillu naalakkersuisui sakkortuumik isornartorsiorpaat. 

Naalakkersuisut Kujataani uranisiorluni suliniutissaq pillugu najukkami innuttaasunik taasititsinissamik kissaateqannginnerannut tunngatillugu neriorsuutiminnik eqquutsitsinnginnerarlugit isornartorsiorpaat. Aleqa Hammondimmi naalakkersuisunut siulittaasuunerata nalaani Siumut arlaleriarluni taama neriorsuuteqaraluarpoq. 

Uranimilli piiavissap piviusunngortinneqarnissaanut Danmark annertuumik akisussaaqataasoq allaatiginnittut aamma isumaqarput. Danskit naalagaaffiata ingerlatseqatigiiffiillu arlallit uranimik piiaanissaq pillugu sunniiniarlutik 1970-ikkunnili sulissutigilerpaat, ilaatigut uranip ilisimatusarfigineqarneranut Risømi Misileraavimmut millionerpassuarnik akileraartartut aningaasaataat atorlugit aningaasaliissuteqarnikkut, EF-ilu - maanna EU-mik taaguuteqartoq - Kuannersuarni uraneqassutsip misissuiffigineqarnissaanut aamma aningaasaliissuteqarsimalluni.

- Danskit naalakkersuisuisa urani pillugu apeqqummi arlaannulluunniit tapersersuiumanatik inissisimanerartut tusartuarparput, taamaattoqanngilluinnarporli. Paarlattuanimmi sullissiviit aqqutigalugit uranisiorluni suliniutit angisuut aallartisarneqarnissaannik maanna siornatigullu naalakkersuisuusut neriuutigisaasa ingerlanneqarnissaannut peqqissutsimut avatangiisinullu sunniutissat saqqummiunneqannginnissaat sulissutigisimavaat, allaatiginnittut taama allapput.

Aammattaaq Enhedslisten, Alternativet, Vedvarende Energi, peqatigiiffik Urani Naamik aamma NOAH Friends of the Earth allaatigisami tunuliaqutaapput.