Nunavik Nunaqarfimmi Akulivimmi alianartumik pisoqartoq
Nunaqarfimmi Nunavimmiittumi Akulivimmi alianartumik arfininngornermi pisoqarpoq.
Inuit nunaqarfimmi Akulivimmi toqutaasimapput. Akulivik Quebecip avannaatungaaniippoq inuilu 650-iullutik.
Angut inuusuttoq 19-inik ukiulik angerlarsimaffinnut pingasunut arfininngornermi unnukkut tillinniarpoq. Takunnittullu unitseriaraluarmassuk, angutip inuusuttup inuit tallimat savimmik kapisimavai. Inuit pingasut toqutaapput, taakkunannga meeraq qulinik ukiulik.
Kativiup politiivisa angut inuusuttoq illumut allamut iseriaraluartoq siumorpaat, sivitsunngitsorlu aallaavaat toqullugulu.
Toqutsinini allaaseraa
Angut 19-inik ukiulik Illitak Anautamik ateqarpoq, toqoraaninilu facebookimini ima allaaseraa:
- Inuit tallimat savimmik kapivakka. Soqutiginngilara inuarsimaguma, Anautak allappoq.
Nunaqarfimmi aqutsisunut ilaasortap Timothy Aliqup tv-qarfimmut CTV-mut oqaatigaa nunaqarfimmiut aliatsassimaqisut aqutsisullu iliuusissamik ujartuiniarlutik naapeqatigiissasut.
Inuit katillugit sisamat arfininngornermi toqutaapput arlallillu ikilerneqarlutik.
