Ole Dorph: Ikuallattoq isumagineqapallakkaluaruni taama annertutigissanngikkaluarpoq
Pinngortitami annertuumi 15 kvadratkilometerisut annertutigisumi ikuallanneq nalunaarutigineqarneranit ullut qulingiliuat qaanngiummata aatsaat oqartussaasunit takuniarneqarpoq.
AAMMA ATUARUK Atortorissaarutinik nutaanik pissarsinissaq isumaliutigineqarli
Qaasuitsup Kommuniani ikaarsaariarnermut ataatsimiititaliami ilaasortap upalungaarsimasuutitat kingusinnaarlutik iliuuseqarniarnerat isornartorsiorpai
- Nassuttuumi ikuallattoq annertoorujussuartut oqaatigineqarpoq, taamaattumik qanoq iliuuseqartoqarsinnaaneranik siusikkut nalilersuisoqarsimasarariaqaraluarpoq, Bendt B. Kristiansen oqarpoq, - putsup siaaraateqattaartup ingalassimatinniarneqarnera anguneqarsimassagaluarpoq, Qaasuitsup Kommuniani kommunalbestyrlelsemi ilaasortaq aamma Inuit Ataqatigiit politikkikkut oqaaseqartittagaat, Bendt B. Kristiansen taama oqarpoq.
Qaasuittsup kommuniani upalungaarsimasuutitat pisortaat Bjarne Gregersen upalunaarsimasuutitaneersut marluk peqatigalugit Nassuttuumi pinngortitami ikuallanneq pingasunngornermi takuniarpaat.
Taakua takusaat aallavigalugit kommunemi sillimaniarnermut kommmissioni aalajangissaaq susoqassanersoq.
Qaasuitsup Kommuniani borgmesteri Ole Dorph kommissionmi siulittaasuuvoq.
Kommissionip ataatsimiinnissaa sioqqullugu susoqassanersoq borgmesterip eqqoriarnianngilaa
Taamaattorli Bendt B. Kristiansenip isornartorsiunera paasisinnaalluarlugu Ole Dorph oqarpoq.
AAMMA ATUARUK Nassuttuumi Amitsorsuarmilu angallattoqannginnissaa kajumissaarutigineqarpoq
Ikuallanneq qaminneqarsimasinnaagaluarpoq
- Upalungaarsimasuutitat ulluinnarni sulinerminni tamanna naliliinerivaat, taamaattumillu kingumut eqqarsaraanni, immaqa eqqarsartoqarsinnaavoq, ikuallattoq saassunneqarsimagaluaruni taama annertutigisumik ikuallassimassanngikkaluarpoq, Kommuneqarfik Sermersuumi borgmesteri Ole Dorph taama oqarpoq.
Taassumi ilumuunnginnerarpaa, ikuallannerup nalunaarugineqarneranit ullut qulingiluat ingerlaneranni susoqarsimanngitsoq, tassami isumannaallisaasunit ullumikkut alakkarneqarmat.
- Oqartoqarsinnaanngilaq ullut qulingiluat susoqarsimanngitsoq, ikuallanneq nalunaarutigineqarmalli naliliersuinerit ullut tamaasa ingerlanneqartarput, ikuallanerlu ima annertutigilersimavoq pinngitsoorani qanoq iliuuseqarfigineqartariaqarluni.
Qaasuitsup Kommuniani upalungaarsimasuutitat Nassuttuumi ikuallattoq qulimiguulimmik pingasunngornermi takuniarpaat, kingornalu susoqassanersoq naliliiffigineqassaaq.