Sungiusaasup isumaqatigiissuteqarneq nuannaarutigaa
- DBU taamaalilluni akisussaaffeqarnerminik takutitsivoq, isumaqatigiissullu periarfissarpassuarnik ammaassissammat assiginngitsorpassuartigut pitsaalluinnartuuvoq, nunanut allanut unammisartut sungiusaasuat nittartakkamut sermitsiaq.ag-mut taama oqarpoq.
Isumaqatigiissutip ilaatigut imaraa Nunatsinni siunissami isikkamik arsaalluni pissartanngorniuttoqarnerani arsaattarfinni sioraasuni unammisoqartarunnaarnissaa. Taarsiullugumi Nunatsinni sumiiffinni assigiinngitsuni sisamani arfinilinniluunniit ivigaasaaqqanik arsaattarfinnik pilersitsisoqassaaq.
AAMMA ATUARUK GBU: UEFA-mut ilaasortanngornissarput qulakkiissavarput
Nunanullu allanut unammisartut sungiusaasuata qularutiginngilaa tamanna timersornikkut qaffassaataassasoq.
- Sungiusaasuuneq nuannerneruliinnassaaq, sungiusaasunimmi ilinniartitsisoqartussaavoq. Unammisartut piffissani sivikitsuinnarni sungiusartinneqartarneri tamaanga killeqassaaq, ukiormi kaajallallugu sungiusaasoqarnissaq pingaartupilussuuvoq, Tekle Ghebrelul sermitsiaq.ag-mut taama oqarpoq.
Aamma neriuutiginerarpaa Nunatta Island Gamesimut peqataasarunnaarluni nunani tamalaani arsaattartut kattuffissuinut ilaasortanngorsinnaassasoq.
- DBU-p GBU-llu qanittumik suleqatigiinnissaat neriuutigeqaara, tamannami Nunatta timersornikkut siunissaanut alloriarnerussammat angisooq, angutit isikkamik arsaallutik nunanut allanut unammisartut sungiusaasuat taama oqarpoq.
AAMMA ATUARUK GBU-p DBU-llu Nunatsinni isikkamik arsaanneq peqatigiillutik ineriartortinnialeraat