Nunanut allanut angalannginnermi sillimmasersimanissaq pingaaruteqarpoq
Namminersorlutik Oqartussani Inatsisilerinermut, sulisoqarnermut sullissinermullu immikkoortortaqarfimmi pisortaq Gitte Arvegaard, taama oqarpoq:
- Napparsimalersinnaanermut sillimmasigaanermut allagartaq sungaartoq Danmarkimeersoq, allagartarlu tungujortoq, nunani EU-mi ilaasortanut naatsorsuussaq, Kalaallit Nunaanniit angalasunit atuutinngillat. Danmarkimullu nunanulluunniit Europamiittunulluunniit angalaniaraanni sillimmasersimanissaq taamaammat pingaaruteqarpoq, Namminersorlutik Oqartussani Inatsisilerinermut, sulisoqarnermut sullissinermullu immikkoortortaqarfimmi pisortaq Gitte Arvegaard, oqarpoq.
Namminersorlutik Oqartussat aamma Peqqinnisaqarfiup angerlamut angallanneqarnermut aningaasartuutinik aamma nunani allaniinnerup sivitsorneranut aningaasartuutinik matussusiineq ajorput.
Danmarkimiitillutilli tassanngaannartumik napparsimalissagaluaruit, napparsimmavimmullu assersuutigalugu unittariaqassaguit, taava Peqqinissaqarfiup aningaasartuutit matusinnaavai. Peqqik.gl-ip quppersagaani tamanna atuarneqarsinnaavoq.
Assersuutigaluguli Frankrigimut angalassaguit, malittarisassat allaasut, Gitte Arvegaardip oqaatigaa:
- Frankrigimi angalatilluni nakorsiartariaqassagaanni, napparsimmavimmulluunniit unitsitaagaanni, taava Frankrigimi innuttaasut assigalugit pineqarnissaq naatsorsutigineqassaaq, tassalu nakorsiarnermi akiliisoqartarpat, taava aamma akiliinissaq naatsorsuutigisariaqassaaq. Ilami Europami nunat amerlanerit assersuutigalugu peqqinnissaqarfimmik atuinermut atatillugu akiliisitsisarput, Gitte Arvegaard, Namminersorlutik Oqartussani Inatsisilerinermut, sulisoqarnermut sullissinermullu immikkoortortaqarfimmi pisortaq, oqarpoq, sumilu najugaqarnermut uppernarsaat, tassa bopælsattesti Nunatsinneersoq, Europami nunani, nunanilu Europap avataani atorneqarsinnaanngitsoq erseqqissaatigalugu.
Nunani allani ataasiakkaani peqqinnissaqarfinnik atuisinnaanermi aningaasartuutinik Nunatta matussusiisarsinnaanissaa pillugu nunat sorliit isumaqatigiissusiorfigisimanerai takuniaraanni, taava www.peqqik.gl -imi takuniarneqarsinnaapput.
