Savalimmiut: Nunani allamiunut suliassaqarfiup akisussaaffigilernissaa sivisunaarunneqartoq

Sermitsiaq.AG taama allaaserisaqarpoq.

Danskit nunani allamiunut akuunerulersitsiniarnermullu ministeriata Inger Støjbergip nunani allamiunut susassaqarfimmut akisussaaffiup Savalimmiunit 2016-imi juulip qaammataani tiguneqarnissaa pillugu Savalimmiuni nunanut allanut tunngasunut naalakkersuisoq Poul Michelsen 2015-imi ukiakkut isumaqatigiissuteqarfigaa.

Tamannali sivisunaarunneqarpoq, danskillu ministeriata ajuusaarutigaa, Poul Michelsen savalimmiormiut inatsisartuinut taama ilisimatitsivoq.

AAMMA ATUARUK Savalimmiormiut nunanut allanut ministeriata Danmark tupaallaatigigaa

- Suliaq arriitsupilussuarmik ingerlanneqarpoq. Inger Støjbergimit allagarsiakka kingulliit atuaraanni, taava sivisunaarunneqarnera utoqqatsissutigaa. Namminneq ajornartorsiuteqarnerannik pissuteqarunarpoq, immaqa. Tamannali suleqatigiinnermut, akisussaaffimmik tigusinissamik inatsit naapertorlugu ingerlatatsinnut tunngatillugu naleqqussorinngilarput, savalimmiormiut ministeriat taama oqarpoq.

Isumaqatigiinniutigineqartussat ilagaat nunani allamiunut susassaqarfimmut akisussaaffiup nuunneqarneratigut Savalimmiut qimaasunik tigusisassanersut.

AAMMA ATUARUK Savalimmiut Danmarkilu nunanut allanut politikki pillugu nutaamik isumaqatigiissuteqalersut

Danmarkimit aallartitat isumaqatigiinniarnerit nangikkiartorlugit marsip qaammataani Torshavniliarpata ilaatigut tamanna oqaluuserineqartussaavoq.

Savalimmiut qimaasunik tigusisinnaanissaat Poul Michelsenip siornatigut tapersersimavaa, tamannali illuatungiliuttunit isumaqatigineqanngilaq, taakku isumaqaramik tamanna nunap aningaasaqarneranut annertuallaamik tatisissasoq.

AAMMA ATUARUK Isumaqatigiissut Naalagaaffeqatigiinni nunanut allanut politikkikkut assortuussutaalersoq