NUNA OIL-ip siulittaasuata aningaasarsiakinnerulernissani piareersimaffigaa

Nunatsinni uuliasorneq pinngitsoorpoq. Taamaammat NUNA Oil A/S-ip suliani annikillisariaqarsimavai.

Ingerlatseqatigiiffiup ukiuni tallimani kingullerni ukiumoortumik nalunaarusiaasa takutippaat katillugit 39 millionit koruuninik amigartooruteqarfiusoq.

NUNA OIL A/S-ili ajutuunngitsoq, siulersuisuni siulittaasoq Stine Bosse isumaqarpoq:

- Pissutsimmi allanngoriartorput. NUNA OIL pilersinneqarmat aalajangerneqarpoq ingerlatseqatigiiffik uuliasiorsinnaanermut periarfissanut tunngatillugu pisunut malinnaassasoq, tamannalu pissusissamisoorsoraara, Stine Bosse oqarpoq.

Ingerlatseqatigiiffiup sulisuni ikilisinniarlugit sisamanngornermi ataatsimeersuarnermi aalajangiuppaa. Sulisut marluinnanngussapput, taavalu aamma ukiuni aqqaneq marlunni pisortaasimasoq, Hans Kristian Olsen, aasaru soraarsinneqartussanngorluni.

NUNA OIL A/S ujarassiuumik siunissami aqutsisoqalissaaq, taannalu PhD-mik ilinniagalimmik sulisoqassasoq, Stine Bosse oqarpoq.

Ujarassioorli pisortatut, 1,4 millionit koruuninik ukiumut aningaasarsialittut, atuuffeqalissanngilaq:

- Aningaasartuutit ikilisinneqassapput, Stine Bosse oqarpoq.

AAMMA ATUARUK Uuliasiorusuttoqanngimmat pisortaq soraartussanngorpoq

Taamatuttaaq siulersuisuniittut tallimaasarunnaarlutik pingasunut ikilisinneqassapput.

Siulersuisuni siulittaasoq Stine Bosse aningaasarsiat pisartagai 150.000 koruuniupput, ingerlatseqatigiiffillu annikillisaavigineqalerpat ikinnerusunik aningaasarsisalersinnaanini piareersimaffigaa.

 - Aningaasarsiakka aamma isiginiarneqassappata isumaqarpunga pissusissamisuuginnassasoq, siulersuisuni siulittaasoq Stine Bosse oqarpoq.