Nukissiuutinik atuinerput 2014 appariarpoq

Nunatsinni nukissiuutinik atuinerput ukiut pingajussaanik siorna 2014-imi appariarpoq. Nukissiuutinik atuinitta apparaluttuinnarneranut pissutaanerusoq tassavoq, innuttaasut ukiuni kingullerni aningaasameernerulernerat, illuatungaatigulli aamma imeq atorlugu nukissiuutit pitsanngoraluttuinnarnerisa kinguneranik atuinikinnerulersimalluta.

Allattoq Apollo Jeremiassen

decembarip 15-at 2015 13:17

- Aningaasarsiorneq appariarpat nukissiuutinik atuinikunnerulersarpugut, tassa ima paasillugu, nioqqutissiorneq appariarpat nikissiuutinik atuiinerput aamma appartarpoq, Nunatta Naatsorsueqqissaartarfiani siunnersorti, Lene Baunbæk oqarpoq.

Nunarput tamaat ataatsimut isigalugu siorna 2014-imi nukissiuutinik atuinerput 2013-mut naleqqiullugu, 5,5 procentimik appariarsimavoq, tassalu tamanna ilaatigut aningaasarsiornerup appariarneranik pissuteqartoq, Lene Baunbæk oqarpoq. Aammattaarli nukissiuutit mingutsitsisartut, soorlu gasoliap atorneqannginnerulernerisa kinguneranik nukissiuutinik atuinikinnerulersimalluta.

- Nukissiuutinik mingutsitsisinnaasunik atuinerput nukissiuutinik ataavartunik atuinitsinnut naleqqiukkaanni tamanna pitsaanerujussuuvoq tassa annikinnermik atuisaratta, Lene Baunbæk oqarpoq.

Aamma atuaruk Igaliku seqernup anorillu nukinganit innaallagiaqalissaaq

Aamma atuaruk Nunarput avatangiisimik mianerinninnerulissaaq

Tamannalu aamma allatigut pitsaaqutteqartoq, Lene Baunbæk oqarpoq.

- Nukissiuutinik minguittunik ataavartunillu atuinitsinnut naleqqiullugu, gasolia atorlugu innaallagissiornermi, kiassarnermi aamma imeqarnermi CO2 aniatitarput annertuupilussuusarpoq.

Tassalu nukissiuutinik ataavartunik atuinitsinni CO2-mik aniatitsinerput appariangaatsiarsimasoq, Lene Baunbæk oqarpoq.

- Gasoliap atorneqarnera appariarmat CO2-mik aniatitsinerput aamma appariarpoq.

Nunatta Naatsorsueqqissaartarfiani siunnersorti, Lene Baunbæk taama naliliivoq.

Nukissiuutinik atuineq 2002-mi appasittoq eqqarsaatigalugu 2014-imi atuinerput aatsaat taama aamma appasitsigaaq.