Nunarput avatangiisimik mianerinninnerulissaaq
Kalaallit Nunaat avatangiisimik mianerinninnerulissaaq. Naalakkersuisut taama anguniagaqarlutik Kujataani erngup nukinganik nukissiorfik Qorlortorsuaq 144 millionit koruuninik aningaasaliiffigaat.
Tamanna aningaasanut inatsimmi 2016-imi 2017-imilu 72 millionit koruuninik immikkoortitsinikkut pissaaq.
Nukissiorfissat marloriaatinngorpaat
Aningaasaliinerup erngup nukinganik nukissiorfiup nukissiorsinnaanera marloriaatinngussavaa, nukissiorfiullu Qaqortup Narsallu kiassarnermut pisariaqartitsineranut nukissiorsinnaanissaa qulakkiissavaa.
Piviusut
Nukissiuutitigut pilersorneqarnitta annertunersaa suli tassa nunap iluaniittumeersuupput soorlu assersuutigalugu uulia benzinalu.
Innaallagissap kiassarnerullu 70 procentia, Nukissiorfinniit atuisartunut tunniunneqartoq nukissiutitigut ataavartumeersuuvoq.
Inuiaqatigiinni atuinitta pingajorarterutaannaa Nukissiorfiit tunniussarivaat.
Uuliamik kiassaasersukkat, inissiatsinnut kiassaataasut, katillugit orsussamik ima atuitigipput allaat Nukissiorfiit innaallagissamut kiassarnermullu atuinera sipporlugu. Tigusiffik Namminersorlutik Oqartussat
Nukissiorfiit politikerinut sumiiffimmi tassani pisariaqartitsineq annertusutut nalilersimavaat ilaatigullu kiassarnermut uuliamik atuinermik annikillisitsisinnaasoq nalilerlugu.
Aamma atuaruk IA: Qasiannguit Aasiaat Kangaatsiarlu ineriartortinneqartariaqalerput
Naalakkersuisooqatigiit Naalakkersuisullu nalunaarutaat kingulleq naapertorlugu Tasiilami erngup nukinganik nukissiorfiup allineqarnissaanut siunnersuummik suliaqartoqarpoq, siunnersuut akuerineqassappat nukissiorfik 2017-imi allilerneqassaaq.
Nukissiorfiit immikkoortortaqarfiinut pilersaarut nutaaq
Innaallagissiorfiit ineriartortinneqarnissaat politikerit kissaatigaat. Tamanna nukissiorfiit immikkoortortarfiinut pilersaarut nutaaq atorlugu pissaaq. Pilersaarut aappagu suliarineqartussaq ilaatigullu nukissiorfiit ukiuni tullerni aningaasalersorneqarnerannik misissuisussaq.
Aningaasaliiffigineqarsinnaasutut eqqartorneqartut ilagaat Aasiannut Qasigiannguanullu innaallagissiortussamik erngup nukinganik nukissiorfiliornissap misissorneqarnissaa.
Seqernup kissaanit nukiliuutit, innaallagissiuutit anorisaatit erngullu nukiinik nukissiorfeeqqat eqqarsaatigineqarnissaat pingaartinneqarpoq.
