IA: Qasiannguit Aasiaat Kangaatsiarlu ineriartortinneqartariaqalerput
Qasigiannguit Aasiaat Kangaatsiarlu inuussutissarsiutitigut piorsaaffigineqartariaqarput, taama Inuit Ataqatigiit Inatsisartuni ilaasortaatitai Ane Hansen aamma Aqqaluk Lynge Naalakkersuisunut siunnersuuteqarput.
Kujataani nukissiorfiliorneq aallartereersoq Sisimiullu tullinnguunnerat eqqaasitsillugulu, Ane Hansen aamma Aqqaluk Lynge oqariartuuteqarput Qasigiannguit Aasiaat Kangaatsiallu kommuneqarfii katillutik 6000-it sinnerlugit innuttaqartut inuussutissarsiutitigut siunertaqarluaraluarlutik ukiuni arlalissuanngortuni siuariartortutut taaneqarsinnaanngitsut.
-Kommuneqarfinni pineqartuni inuussutissiornikkut piorsaaniarnermi unittooqqasoqarpoq, taamaattumik Qeqertarsuup tunuani inuussutissarsiutitigut inerisaaneq malunnaatilimmik aallariassappat erngup nukinganik nukissiorfiliassaq Qasiagiannguit eqqaanniittoq tulliuttariaqavippoq, Ane Hansen aamma Aqqaluk Lynge allapput.
Tamanna pillugu Naalakkersuisut erngup nukinganik piorsaaneq aningaasalersueriaaserlu aamma pilersaarusiortariaqaleraat Ane Hansen aamma Aqqaluk Lynge allapput.
