Aviisi: Niviarsiaraq killisiorneqarnissaminut ullut 165-it utaqqivoq
Matumani politiit killisiuisussat piffissaqalernissaat utaqqineqarsimavoq.
Niviarsiaqqap arnaata, atornerluisimaneq pillugu politiinut nalunaarutiginnittup oqaatigaa utaqqineq naalliunnarsimasoq.
- Utaqqineq panimma eqqaamasaanut sunniuteqarnissaa ernumassutigaara,
Annilaagatigaara, paninnut suliap ajoquserneqarnissaa, sivisuumimmi utaqqisimavoq, paninnullu ajortuliortoq suli eqqartuunneqarani - pisimasormi pillugu eqqaamasai assigiikkunnaarsimapput, Katrine Politikenimut taama oqarpoq.
Politikenip kingusinnerusukkut oqaluttuaraa, Danmarkimi politeeqarfiit qulit malittarisassat naapertorlugit atornerluisoqarsimaneranut atatillugu politiinut nalunaarutiginninnerit sivisunerpaamik ullut arfineq marluk ingerlanerini meeraq pineqartoq video atorlugu killisiorneqareertussaasoq.
Nakkutilliisarneq sukateriffigineqartoq
Naalagaaffiup politiivisa paasiniaasartuisa video atorlugu killisiuisarnermi utaqqisarneq pillugu 2017-imi nakkutilliisarneq sukateriffigaa.
Taamaaliornikkut inatsisinik atuutsinermut ministeriaqarfik pisoq pillugu ilisimatinneqartarniassammat.
Kalaallit Nunaat Savalimmiullu suliniummi ilaanngillat, naalagaaffiulli politiivisa paasiniaasartuisa Kalaallit Nunaanni politiit ukiup nikinnerani utaqqisarneq pillugu naatsorsuusiornissaannik piumaffigisimavai.
Taamaattumik Kalaallit Nunaanni meeqqat kinguaassiutitigut atornerlunneqarsimasut pillugit suliat agguaqatigiisitsinikkut qanoq sivisutigisarnersut oqaatigiuminaattoq, Politiken allaaserisaqarpoq.
