VIDEO Nittartakkamik inuunermik annaassisinnaasumik pilersitsinialersoq
Ikiorneqarnissamik pisariaqartitsisut amerlanerusut ikiorneqarnissaat anguniarlugu nittartakkamik maanna pilersitsinialerpoq.
- Inuk kinaluunniit nalunaaqutalernagu ajornartorsiulersinnaagami. Taava amerlanerit nalusasamikku sumut saaffiginnissanerlutik. Politeeqarfimmut, napparsimmaveqarfimmut imaluunniit sumut?
- Nittartakkamut iserluni paasissutissat tamaasa pissarsiarineqarsinnaassapput, Paninnguaq Heilmann KNR-imut taama oqarpoq.
Aamma atuaruk Suliniuteqarnermut nersornaaserneqarnini tulluusimaarutigaa
Nittartagaq kisimiinngilatit.gl-imik taguuteqassaaq aappaagulu saqqummersinneqartussatut pilersaarutigineqarluni.
- Inuiaqatigiittut immitsinnut ikiorsinnaagatta utaqqiinnarnagit tarnip pissusaanik ilisimasallit. Iliuuseqarsinnaavugut kivitseqatigiilluta.
- Pingaarnerpaavoq ulloq unnuarlu saaffiginnittoqarsinnaanissaa, pilersitsiniartoq Paninnguaq Heilmann taama oqarpoq.
Aamma atuaruk Imminut toqukkusullutik eqqarsaateqartut ikiortissarsiornerat ajornakusoortoq
Saaffiginniffissat nittartakkami ersarissumik allanneqarsimassapput. Aammattaaq allalluni apeqquteqarnissaq periarfissaassaaq.
- Imminut toqunnissamik eqqarsaateqarsimasut imaluunniit annaasaqarsimasut allatigulluunniit qaangigaqarsimasut oqaluttuarlutik neriuummik tunisisinnaapput.
Paninnguaq Heilmannip imminut toqunnissamik eqqarsaateqarluni saaffissanut assigiinngitsunut innersuunneqaqattaarneq nammineq misilissimavaa. Maannalu suliniutini Inuuneruna Iggoraarsuk aqqutigalugu allat pitsaanerusumut aqqutissiuunnissaannik suliaqarpoq.