Nipi ilisarnarluinnartoq Nuummi maanna tusarsaavoq
Inuit S-61-ip nipaa tusaagaangamikku eqqarsartarsimassapput allakkat, poortukkat inuilluunniit tikikkiartortut, naak ilaatigut immaqa silapilukkaluartoq.
Air Greenland Nuummi timmisartoqarfimmut kikkunnut tamanut ammasumik sapaatip-akunnerata massuma naanerani kaffillertitsipput, S-61-imullu akikitsumik ilaasinnaanissaq aamma periarfissanngortissimallugu.
Periarfissarlu tamanna inuit 500-nit amerlanerusut atorluarsimagaat, Air Greenlandimi tusagassiisartup Kathrine Hjejlholt Nathanielsenip KNR-imut ilisimatitsissutigaa.
Qulimiguulik S-61 inunnik Kujataani 2012-imi kingullermik angallassivoq, annaassiniartarnernullu taamanikkulli taamaallaat atorneqalerluni.
S-61-illi ukiuni kingullerni 50-ini Nunatsinni angallassisimanera ataatsimut katikkaanni assigaa Nunarsuarmik Ækvatorip nalaani 1000-eriarluni kaajallaassinermik.