Nioqqutissat Nunatsinneersut amerlanerusut EU-mut nioqqutigineqartariaqartut
Nioqqutissat Nunatsinneersut ajornannginnerusumik EU-mut niuerutigineqartalissasut Jørn Dohrmann, Dansk Folkepartimeersoq, EU-parlamentimi ilaasortaasoq isumaqarpoq.
Nunat Avannarliit Killiit Siunnersuisoqatigiivisa sapaatip akunnermi matumani ataatsimiinneranni Nunatta EU-mik niueqateqarniarnera ajornakusoorsinnaasartoq oqaatineqarpoq pitsanngorsarneqarnissaalu kissaatigineqartoq DF-imeersup oqaatigaa.
- Nioqqutissat Kalaallit Nunaanneersut EU-mi ilisimaneqarpiannginneri unammillersnarsinnaavoq, tamannalu EU-p naammaginartumik iliuuseqarfigisimanngilaa.
- Kalaallit Nunaata tunniussinnaasai EU-mi ilisimaneqarnerulernerisigut ajornartorsiut qaangerneqarsinnaasoq neriuppunga, Jørn Dohrmann tusagassiutinut allappoq.
Jørn Dohrmann isumaqarpoq Europami politikerit nunani assigiinngitsuneersut Nunatsinnut tikeraartinnerisigut oqaluttuarisaanitsinnillu ilisimasaqalersinnerisigut Nunatta tunniussinnaasaanik ilisimasaqalersitsisoqarsinnaasoq.
