Niaqornani innuttaasut qimagussortinneqalerput

Tassaarsuaqaqqeratarsinnaanera politiinit aarlerigineqarmat innuttaasut qimagussortinneqarnissaat aalajangerneqarpoq. Politiit tusagassiutinut allapput.

- Uummannap sulluani qaqqamit sisoortoqarsinnaanera suli aarlerinartoq nalilerparput. Taamaammat Niaqornani innuttaasut qimagussuutsinneqarnissaminnut piareersassapput. Pisariaqavissunik taamaallaat nassataqartoqarsinnaavoq.

AAMMA ATUARUK Politiit illorsuarmiunik qimagussuipput

Uummannap sulluani nunaqarfiit sisamat immap ulikkiartornera nakkutigissagaat politiit unnummut siusinnerusukkut nalunaarutigaat:

- Saattuni, Ukkusissani Qaarsunnilu innuttaasut immap qanoq issusaa suli nakkutigissavaat. Imaq ulikkiartulerpat siggartaassuarlu aallartinneqarpat qaqqamukartoqassaaq.

Tamassuma saniatigut Illorsuarni innuttaasunik qimagussuutsitsineq unnummut siusinnerusukkut eqqaaneqartoq naammassisimalersoq politiinit oqaatigineqarpoq:

- Illorsuarnit qimagussuutsitsineq naammassivoq. Innuttaasut tamarmik maanna Issittumi Sakkutooqarfiup umiarsuaaniilersimapput.

Qanoq tassaartoqalerpa?

Uummannap Upernaviullu qanittuani sumiiffinni arlaqartuni tassaartoqarneraani arfininngornermi unnukkut nalunaarutigineqarpoq. Nunaqarfik Nuugaatsiaq tassaarsuarmik eqqorneqarnerpaasoq, tassani innuttaasut qulimiguulimmik Uummannamukaanneqarput. Nunaqarfimmi illut hunnorujuk missaanniittunit aqqanillit tassaarneranit aserorneqarput. Inuit sisamat sapaammi suli maqaasineqartutut nalunaarutigineqarpoq.

Tassaarnera sumit aallartinneqarsimanersoq suli erseqqissumik ilisimaneqanngilaq. Ilisimatuussutsikkut sullissivimmit, GEUS-imit, ilimagineqarsinnaasut marluupput: Nuna sajussimasinnaavoq qaqqamiluunniit sisoorsimasoqarsinnaavoq. Taakkuli arlaannaalluunniit peqqutaanersoq suli paasisinnaasimanngilaat.