Neriniartarfiit sukattariaqartut
Neriniartarfiit nunani avannarlerni danmarkimiluunniit ilinniarsimasunik igasoqanngikkuni sungiusaatigalugu sulisussanik sulilersitseqqusaajunnaarput.
Tamanna inuussutissalerinermik ilinniarfiup, Inuilip, akunnittarfiit neriniartarfiillu peqatigalugit aalajangiukkaat, Atuagagdliutit allaaseraat.
Aviisi naapertorlugu malittarisassanik sukaterineq neriniartarfiit ilaannut Ilulissamiittumut kinguneqareersimavoq. Tassami neriniartarfik Danmarkimi nunaniluunniit avannarlerni ilinniarsimasumik igasoqanngimmat.
Malittarisassanik sukaterineq ilinniartut oqaatsinik aporfeqarnatik ilinniarsinnaannissaat anguniarneqartoq oqaatigineqarpoq.
- Assersuutigalugu igasunngorniarlutik ilinniartut igasumit thailandimeersumit ilinniartinneqassaguni oqaaseqatigiinnginneq pissutaalluni paaseqatigiinniarneq ajornakusoorsinnaavoq, Erik Bjeggaard, Hotel Arcticimeersoq oqarpoq.
Taanna aamma akunnittarfiit, neriniartarfiit takornariaqarnermullu immikkoortortaani, Sulisitsisut ataaniittumi ilaasortaavoq, Inuilimilu siulersuisuni siulittaasuulluni.
- Peqatigiiffittut ilaasortat toqqaannartumik akuliuffigisinnaanngilagut, taamaattorli ilinniarfissat pitsaasuunissaat qulakkeersinnaavagut, Erik Bjerregaard KNR-imut oqarpoq.
Taassuma aamma nassuiaatigaa igasut Danmarkimi nunaniluunniit avannarlerni ilinniarsimasuunissaannik piumasaqarneq ilinniartut ilinniakkaminnik qaffassaqqissinnaanissaat qulakkeerniarlugu malittarisassanik sukaterisoqarsimasoq.
