Akitsuutikinnerulerneq Danmarkimut billetinik akikinnerulersitsissasoq
Air Greenland danskit naalakkersuisuisa mittarfeqarfimmut pilersaarutaanik malinnaasoq taama nalunaarpoq. Pilersaarummi siunertanut ilaavoq timmisartortitseqatigiiffiit mittarfeqarfiup atorneranut akiliinikinnerulernissaat.
- Akileraarummik appartitsinissaq soorunami Air Greenlandip nuannaarutigaa. Kalaallit Nunaanniit
Københavnimut uterlugulu angalanermi mittarfeqarfiup atorneranut akiliinikinnerusalissagutta atuisutsinnut aamma akikinnerulissasoq, pisortaagallartoq Jacob Nitter Sørensen KNR-imut oqarpoq.
Mittarfiup timmisartortitseqatigiiffiullu akornanni akit naliginnaasumik isumaqatigiinniutigineqartaraluarput, DR-ili naapertorlugu Københavnip mittarfeqarfia inatsimmik aalajangersimasumik malitassaqarmat danskit naalagaaffiata akitsuutip annertussusaa nammineq aalajangiiffigisinnaavaa.
Air Greenlandilli ileqqaarutip annertussusissaa maannagaaq oqaatigisinnaanngilaa, danskimmi naalagaaffiat suli aalajangersagaqanngilaq.
Københavnip mittarfeqarfianut timmisartortitseqatigiiffiit ilaasumut ataatsimut 183 koruunit maannakkut akiliutigisarpaat, DR-ilu naapertorlugu Nunani avannarlerni tamanit taanna akisunersaavoq.
Københavnimut minneq assersuutigalugu Oslomi mittarfimmit 79 procentimik akisuneruvoq.