Pinngortitaleriffik qilalukkanik kisitsisoq

Maannalu kisitsisoqarnissamut piffissanngorpoq tamannalu timmisartoq suluusalik Twin Otter atorlugu Ittoqqortoormiit kangerlussuani Kangertittiimi kisitsisoqarpoq,  ilisimatuut aqutsisuat professor Mads Peter Heide-Jørgensen oqarpoq.

Qilalukkanik qernertanik kisitsinerup saniatigut  qilalukkat  qernertat arfineq marluk  tunumi Hjørnedalip eqqaani nalunaaqutserneqarput.  Hjørnedalimi qilalukkat qernertaqatigiit 50-it missaanniittut ukiuni arfineq pingasuni kingullerni Pinngortitaleriffimi ilisimatuunit malittarineqarput, ingerlaarfigisartagaat qanoq annertutigisunik nerisaqartarnersut paasiniarneqarlutik.

Qilalukkat avatangiisimini allanngornernit sunnigaasarnerat paasiniarneqartuni pingaarnertut ilaavoq aamma  Baffinip Kangerliumarngata ikkannersuani qilalukkat ukiumi najugannaavanni qilalukkat aalisarnermut aporaassuteqarput.  

Tasiilap Ittoqqortoormiilu akornanni Kangerlussuarmi  siornatigut misissuiffigineqarsimanngitsumi qilalugaq qernertaq ataaseq siullerpaamik misiligutaanerusumillu nalunaaqutserneqarpoq.

Kangerlussuarmi qilalukkamik qernertamik ataatsimik nalunaaqutsiinerput piviusunngorpoq  Pinngortitamut Avatangiisinullu Naalakkersuisup Mala Høy Kúkop Naalakkersuisoqarfiatalu suliamut soqutiginnillutik immikkut aningaasaliissuteqarneratigut, Mads Peter Heide Jørgensen unnersiorpoq.

Qilalukkanik qernertanik misissuinermi paasisat Canaadamiut kalaallillu qilalukkat pillugit ataatsimoorussamik ataatsimiititaliaannut aappaagu upernassakkut marsimi saqqummiunneqassapput.