Unnuakkut timmisartuussisalernerup Keflavikkimullu attaveqalernissap takornariat amerlisissavai

- Taama aaqqissuussinerput Kalaallit Nunaanni takornariartitsinermut sunniuteqartorujussuussasoq isumaqarpunga.

- Kalaallit Nunaaliarlutit angalaniaruit angalaneq sivisusarpoq, angalaninnullu atatillugu ulluni marlunni Københavnimiittariaqassaguit, tassa takornariarfittut allaalluinnartumiittariaqassaguit, tamanna piffissamik atuilluarnerunanilu aningaasanik asuli atuineruvoq, taamaattumik sunniuteqarluassasoq isumaqarpunga, Air Greenlandimi tuniniaanermut pisortaq Anika Krogh oqarpoq.

Aamma atuaruk Air Greenland aasaanerani angallassinikkut pilersaaruterpassuaqartoq

Ukiormanna aasaanerani aatsaat taama takornariaqartigaaq, aallarfissatullu pilersaarutit nutaat takornariarusuttut amerlanerulernerannik kinguneqarnissaa neriuutigineqarpoq.

Ilisimanereersutut aasaru aamma Keflavikimit Ilulissanut timmisartuussisoqartassaaq.

Nunani allamiut pingaarnerutillugu Ilulissanut angalaniartut timmisartuussisarnissami tamatumani tunngaviupput.

Islandimit timmisartuussiffissat nutaat tamatuma peqatigisaanik takornariat aallarfinnit assiginngitsunit tikissinnaanissaannik kissaateqartoqarnera isiginiarneqarpoq.

Aamma atuaruk Air Iceland Kangerlussuarmut timmisartuussisalissaaq

Nuup Keflavikillu akornanni maanna timmisartuussisoqartareerpoq. Tupaallaatigineqartumillu Air Greenlandip ilaasorisartakkaminik misissuinerata kingulliup paasinarsisippaa, Ilulissat tikikkusunneqarnerusartut illoqarfiillu pingaarnersaat normu 2-tut inissisimasoq. 

- Tamanna immaqa tupaallaatigilaarpara, Danmarkimimi angalatitsisartunit oqaatigineqarami Nuuk takornariarfissatut soqutigineqanngitsoq, misissuinerpulli annertusillugu nunani allamiut angalatitsisartut ilanngullugit misissuigatta allatut paasisaqarpugut.

- Taakkumi oqaatigaat Nuuk illoqarfiit pingaarnersaattut aamma takornariarusunneqartartoq, Anika Krogh naggasiivoq.