Narsarsuarmi timmisartumik ajutoortut

Timmisartortartut qasoqqasarnerat timmisartornermi isumannaassusermut Danmarkimi Angallannermut aqutsiveqarfiup ajornartorsiutaannginnerartuaraluaraa, taamaattoq inuit pingasut timmisartortartut qasunerat pissutigalugu ukiut qulingajaat matuma siorna Kujataani timmisartup nakkarnerani ajunaarput. Aviisimi Politikenimi ullumi tamanna allaaserineqarpoq.

Tysklandimi timmisartuutileqatigiiffiup, Naske Airip, timmisartuutaa assartuut Kujataani qaqqamut 2001-imi aggustip ulluisa tallimaanni ullaaralaannguaq aporpoq. Timmisartortartut marluk issimasorlu ataaseq tamarmik ajunaarput.

Ajutoornermi nalunaarusiami 2002-meersumi, tusagassiorfinnit eqqaaneqanngisaannartumi, oqaatigineqarpoq, "timmisartumi inuttat qasoqqanertik maluginngitsoorlugu kukkusumik aalajangiisimasut, nalorninartorsioramillu iluatsinngitsoortumik mikkiartorsimasut".

Nalunaarusiami aamma oqaatigineqarpoq, timmisartoq nalunaaquttap akunneranut 500 kilometerinik sukkassuseqarluni Narsarsuarmi qaqqap sivingarngata tungaanuinnaq ingerlasimasoq, timmisartortartullu nalunaaquttap akunnerini 16-ini minutsinilu 56-ini ataavartumik sulisimasut, qulingiluariarlutik aallarlutillu missimallutik, nalunaaquttallu akunnerini 22-ni sinissimanatik.

- Timmisartortartut qasoqqasarnerat ajornartorsiutaaqisoq tamatumuunakkut uppernarsarneqarpoq, tamannalu oqartussaasunit arajutsinaveersaartuartariaqarpoq. Timmisartut ajunaarnerinik misissuigaangamik, aamma timmisartortartut timmisartornerminni qasuersaarnissaannullu malittariassalioraangamik, Rigshospitalimi Flyvemedicinsk Klinikimi nakorsaaneq, Mogens Tangø, aviisimut Politikenimut oqarpoq.

Timmisartut ajunaarnerinut qasoqqaneq 7 procenti tikillugu pissutaasartoq misissuinerit takutippaat.