Naqinnernik ilisarinnissinnaanngitsunut periusissiortoqalerpoq
Naqinnernik ilisarinnissinnaanngitsut ikiorserniarlugit misilitsissusiornissaq iliuusissatullu pilersaarusiornissaq pilersaarutigineqartut, atuartunut immikkut pisariaqartitsisunut siunnersorti Inerisaavimmeersoq Karina Meincke nassuiaavoq.
- Misilitsissut Danmarkimi suliaq misilerarlugu upernaaq aallartipparput. Nunatsinnulli tulluarsakkamik peqartariaqarpugut, oqaatsitsinnut tulluarsarneqassaaq atornissaalu ajornaallisarneqassalluni, Karina Meicke oqaluttuarpoq.
Karina Meincke Inerisaavimmi atorfininnginnermini atuartunut immikkut pisariaqartitsisunut ukiuni qulini ilinniartitsisuusimavoq. Naqinnernik ilisarinnissinnaanngitsunik naammattoorsigajuttarsimavoq.
- Naqinnernik ilisarinnissinnaanngitsut arlallit ukiuni qulini atuartitarinikuuakka. Arlaleriaqalunga eqqarsariaqqilaartariaqarnikuuvunga paasiniarlugu naqinnernik ilisarinnissinnaanngitsoq qanoq ilillunga ikioriassanerlugu. Sineriammi ilinniartitsisut allat taama aamma misigisaqarsimasut oqaloqatigisarnikuuakka. Naqinnernik ilisarinnissinnaanngitsut amerlassusaat kisitsisaatigineqanngikkaluartut atugaaqaaq.
Meeqqat atuarfianni periusissiornissaq siunertarineqarpoq, ilinniartitsisup naqinnernik ilisarinnissinnaanngitsoq qanoq ikiorsinnaavaa qanorlu ikiorfartuisoqarsinnaava aamma atortussat suut pineqarpat. Angajoqqaat qanoq ikiorserneqarsinnaappat qanoq ilillunilu qulakkeerneqarsinnaava naqinnernik ilisarinnissinnaanngitsup pisinnaatitaaffimminik ilisimasaqarnissaa.
Inerisaavik inunnut 40-nut Hotel Hans Egedemi Nuummiittumi isumasioqatigiissitseqqammerpoq, kommuunit tamarmik aamma Namminersorlutik Oqartussat aallartitaqarsimapput, taakkulu saniatigut nunanit allanit immillit ilisimasallit qaaqquneqarsimapput. Isumasioqatigiinnermi peqataasut inassuteqaateqaqqammerput aqutsisullu suleriaqqinnissaq pillugu ullumikkut ataatsimiipput.
