Nannunik Ittoqqortoormiinut qaninngoortunik toqutsisoqassaartoq
Nanorsuit illoqarfimmut qaninngoortut imminut illersorniarluni toqunneqartarnerat pinngitsoortinniarlugu nakkutilliisut pilersinneqarput. Taamatullu suliniuteqarneq iluatsissimarpasippoq.
WWF naapertorlugu, illoqarfiup eqqakkanik ikuallaaviata eqqaani saliisoqarsimanera, taamaattumillu eqqakkat nannut naamasinnaasaasa ikilisimanerat aamma pissutaaqataavoq.
Aammattaaq nanoq qaninngoortoq ataaseq ajoqusinngikkaluarlugu gumminik imassalianik annernartupilussuarnik eqqorlugu qimaatinneqarsinnaasimavoq.
AAMMA ATUARUK Nannut Ittoqqortoormiit illoqarfiannut pisartut amerlapput
Suliniutaasullu iluatsinnera WWF-imi tupinnanngitsumik nuannaarutigineqarpoq:
- Imminut illersorniarluni ataasiarluniluunniit nannumik toqutsisoqarsimannginnera nuannaarutigeqaarput. Nannut silap pissusiata allanngoriartornera pissutigalugu ikiliartupiloornissaat ilimagineqarpoq, taamaammat nannuttassiissutit saniatigut nannunik toqutsisoqannginnissaa pingaaruteqarpoq, WWF-imi suliniutinik aqutsisoq Kaare Winther Hansen taama oqarpoq.
Ittoqqortoormiini nakkutilliisut ukioq manna ingerlaannassassut WWF-ip ilisimatitsissutigaa. Tamatumunngalu peqatigitillugu Nunatsinni sumiiffinni allani assingusunik nakkutilliisoqartitsinissaq pisariaqarnersoq maanna misissorneqaleruttorpoq.