Namminersorlutik Oqartussani kommuninilu sulisut amerleriaateqartut
3.762-it Namminersorlutik Oqartussani piffissaq tamakkerlugu sulisimapput kommuninilu agguaqatigiissillugu 6.315-it sulisimallutik.
2015-imut sanilliullugu piffissaq tamakkerlugu sulisut 193-inik taamaalillutik amerlisimapput.
Naatsorsueqqissaartarfiup kisitsisinik saqqummiussaani nutaani tamanna atuarneqarsinnaavoq.
Inunnik isumaginninnermik suliallit ingammik eqqarsaatigalugit sulisut kommunini Namminersorlutillu Oqartussani amerlisimapput.
Suliaqartunilu tamani inunnik isumaginninneq sulisoqarnersaavoq, piffissaq tamakkerlugu sulisut 128-nik amerlisimallutik.
Namminersorlutik Oqartussani kommuninilu sulisuni isumaginninnermik suliaqartut amerlanersaapput.
Ilinniartitaanermut kulturimullu suliassaqarfimmi 2016-imi piffissaq tamakkerlugu sulisut 2015-imut sanilliullugit 13-inik ikileriarsimasut, Naatsorsueqqissaartarfimmit paasissutissiissutigineqarpoq.