Nunanit allanit

Nalunaaqutsiortoq taarsiivigineqarusuttoq

Nukappiaraq Ahmed Mohammed 14-inik ukiulik nalunaaqutaq nammineq sanasimasani septembarimi nassarlugu atuariartormat politiit tigusaraat. Maannalu taarsiivigineqarnissaminik eqqarsaatersuuteqarpoq.

Allattoq Mads Lynge, Karsten Sommer

novembarip 24-at 2015 11:55

Ahmed Mohammed, 14-inik ukiulik, Texasimilu illoqarfiit ilaanni Irvingimi najugaqartoq, illoqarfik atuarfeqarfillu eqqartuussissulersuunneqarnissaannik eqqarsaatersorpoq, illoqarfimmit atuarfeqarfimmiillu 15 millionit dollarinik, imaluunniit 105 millionit koruunit missaannik taarsiivigineqarnissani eqqarsaatersuutigalugu. Aviisi The Guardian taama allaaserisaqarpoq.

Nukappiaraq taanna septembarimi tusaamasanngorpoq, saviminernik paffequtseriarlugu politiinit tiguneqarami. Nalunaaqutarmi nammineq sanasimasani nassarlugu atuarfiliarpoq, ilinniartitsisorlu isumaqarsimagaluarpoq nukappiaraq qaartartumik nassartoq.

Aamma atuaruk Nukappiaraq qaartartumeeriniartutut pasisaq præsidentimit qaaqquneqarpoq

Illoqarfillu atuarfeqarfillu 15 millionit dollarinik akiliinngippata eqqartuussissulersuunneqarumaartut, nukappiaqqap eqqartuussissuserisuisa sioorasaarutigaat, utoqqatsertoqarnissaalu aamma piumasaralugu.

- Ahmed kikkunnilluunniit sioorasaarinikuunngilaq, innarliisimananiluunniit, tamannami siunertarinikuunngisaannarpaa. Ulloq taanna innarlerneqartutuaq tassaavoq Ahmed, allakkami ilaatigut taama allassimasoqarpoq.

Suliaq inuit internetikkut attaveqaqatigiittarfiini taamanikkut aalassassimaarutigineqaqaaq, Ahmedimmi muslimiunera pissutaalluni isummanik pigiliutiinnakkanik aallaaveqartunik innarlerneqartoq taamanikkut oqaatigineqarpoq.

Ahmed Mohammed ulloriarsiornermut tunngasunik Washingtonimi Det Hvide Husimi pisussamut Barack Obamamit kingorna qaaqquneqarpoq.