Nukappiaraq qaartartumeeriniartutut pasisaq præsidentimit qaaqquneqarpoq
Nukappiaqqammi Ahmed Mohamedimik atillip angerlarsimaffimmini nalunaaqutaliani atuarfimminut nassarmagu politiinit tigusarineqarpoq.
Ilinniartitsisuatami nalunaaqutaliaa qaartartuliaasoralugu pasilliutigisimavaa.
Texasimi aviisimit tamanna siullermik allaaserineqarpoq, kingornalu nunat assigiinngitsut akornanni tusagassiorfiit soorlu tuluit nutaarsiassaqartitsiviisa The Guardianip BBC-llu allaaseraat, inuimmi arlallit isumaqarmata nukappiaqqap upperisaa pissutigalugu politiinit tigusarineqartoq.
Pisup taassuma kingorna nunarsuarmi tamani nutaarsiassaqartitsiviit, aamma USAp præsidentia, Facebookimik pilersitsisoq kiisalu innuttaasut nittartakkatigut attaveqaqatigiittarfiinik atuisut islamimik upperisalinnut akerliuniarneq tapersersugarinagu saqqummertalerput, tamatumunngalu atatillugu isumaqarlutik pilersitsisinnaaneq ilisimannikkusussermillu pigisaqarnerit unitsinneqassanngitsut.
Taakkua saniatigut Ahmed Mohamed Facebookip allaffeqarfianut præsidentillu illorsuanut Det Hvide Husimut pulaarnissaminut qaaqquneqarpoq.
