Nakuusertartunut katsorsarneqarnissamik neqeroorut nutaaq ullumi saqqummiunneqassaaq

Naalakkersuisut peqqarniisaartarnermiit aniguisitsiniarlutik periusissiaannut atasumik piviusunngortitsinissaq siunertaralugu Isumaginninnermut, Ilaqutariinnut Naligiissitaanermut Inatsisinillu atortitsinermut Naalakkersuisoqarfik Katuami Ikinngutigiinnerup Inersuani inunnik aappaminnut peqqarniisaartartunut kamassartarnermillu ajornartorsiuteqartut katsorsarneqarsinnaanerannik neqeroorut novembarip ulluisa 21-anni tusarliunniarpaa.

Naalakkersuisut nittartagaanni tamanna atuarneqarsinnaavoq.

Katsorsarneqarnissamut neqeroorutip taaguutaa tassaavoq Alliaq, Ole Brandip piniartoq Qooqa pillugu atuakkiaani inuttaasut ilaat atsiullugu.

Qooqap inuiaqatigiinni peqqarniisaartarnerit sinnganerillu akiorniarpai, aanaminillu Alliamit isumaginnilluartumit silatuumillu siunnersorteqartuarpoq.

Persuttaasartut anniartitsisarnertik nassuerutigissagaat Alliami paasititsiniaanermi anguniagaavoq, akisussaaffitsillu paasissagaat, kinguneranillu aapparminnik naalliutsitsisarnertik unitsissagaat:

- Alliap ammarneqarnera aappanik persuttaasarnerup pinaveersaartinneqarnerani alloriarneruvoq pingaaruteqarluinnartoq. Angerlarsimaffinni annersaasarnerit amerlasuutigut kinguaariinnit nanginneqartarput, ilisimatullu misissuinerisa aammalu sulinermi ilikkakkat takutereerpaat annersaanernik isigsaqartarnerit meeqqanut ajorluinnartumik kinguneqartartut ilisimavarput, Isumaginninnermut naalakkersuisoq Sara Olsvig ilaatigut oqarpoq.

Alliaq Nuummi, Sisimiuni, Qaqortumi Ilulissanilu tarnit nakorsaannik atorfeqartitsivoq.