Naalakkersuisut Pan Am-ip nunatsinni aaqqissuunneqarnissaanut aningaasaliiniartut
Pan Am-ip Nuummi ingerlanneqarnissaanut Naalakkersuisut 4 millionit koruuninik tapiissuteqarniartut, Kultureqarnermut Naalakkersuisup Doris Jakobsenip pingasunngornermi oqaatigaa.
2 millionit koruunit sillimatinit tiguneqassapput aningaasallu sinneri Kalaallit Nunaanni Timersoqatigiit Kattuffiata Elite Sport Greenlandillu tamarmik aningaasanut inatsimmit aningaasalersorneqartut immikkut 1 millioneernermikkut aningaasaliissutigissavaat.
Pan Am 2018-ip ingerlanneqarnissaa piviusunngussappat Arctic Winter Games nunatsinnit aaqqissuussiffiusoq eqqaassanngikkaanni aatsaat taama angitigisumik aaqqissuussisoqassaaq. Nunatsinnullu tamanna iluaqutaaginnassasoq Doris Jakobsen isumaqarpoq.
- Takusinnaasatsitut nunat aqqaneq marluk peqataassapput qularnanngitsumillu tusagassiutit assigiinngitsut nunatsinnut tikerartussaassallutik Nunatsinnillu annertuumik nittarsaassisuusussaassallutik, Kultureqarnermut Naalakkersuisoq, Doris Jakobsen oqarpoq. Taassuma aamma oqaatigaa takornariaqarnerup iluaqutigisinnaassagaa.
Jakobsenip aamma Pan Am-eqarnera timersornerup iluaqutigissagaa ilimagaa.
- Nunatsinni timersornermut annertuumik eqeersaataassaaq. Nunani allani piumasaqaatinut sillimanerput qanoq inissisimanersoq siunissamilu suut piareersimaffigisariaqarnerigut takussavagut, Jakobsen oqarpoq.
Kommuneqarfik Sermersuup kommuni Pan-Am-ertoqarnissaanut suliniuteqarusuttoq oqaatigisimavaa. Kommuni Pan Am-imut 2 millionit koruuninik tapiissuteqassanersoq Meeqqanut Atuarfinnullu ataatsimiititaliap maajip aqqarnani aalajanngiiffigissavaat.
Suli qulakkeerisoqanngitsoq
Nunatsinni assammik arsartartut kattuffiata siulittaasuata Pan Am Nuuk piviusunngussanersoq oqaatigisinnaanngilaa. Assigiinngitsorpassuimmi piareeqqaarlugit kattuffik aatsaat oqaaseqarsinnaavoq.
Siullertut, pisortanit aningaasaliissutit Pan Am-imut kontomut suli ikineqanngillat. Aappaattut, GFH-ip suliffeqarfiit namminersortut suliniummut tapiissanersut apeqqutaatippai.
- Siulersuisussanik pilersitsivugut taakku ilaatigut aningaasaliisussarsiorneq isumagisussaavaat, Nuka Ole Berthelsen KNR-imut oqarpoq.
Aviaja Lyberth Lennert AWG-eqarnerani aningaasaliisussanut akisussaasoq Pan AM-imut suliniummi siulittaasuussasoq GHF-imi siulittaasut oqaatigaa.
Aviaja Lyberth Lennertili suli suliniartussat ataatsimeeqatigisimannginnamigit KNR-imut oqaaseqarniarumanngikkallarpoq.
Pan Amerikami Pissartanngorniuunnissat ingerlanneqarnissaa 13 millionit koruunit missaannik akeqassaaq siullermillu naatsorsuutigisatut 17 millionit koruuneqassanani.
AAMMA ATUARUK Pan Am piviusunngussappat suli suliassaqaaluppoq
AAMMA ATUARUK Asii glæder sig til Pan Am i Nuuk
11.05 2017 allaaserisaq nuatserneqarpoq. Kommuneqarfik Sermersooq ilisimatitsigaluarpoq katillugit 4 millionit koruuninik aningaaslininissaq oqaluuserineqassasoq. TAmannali ilumuunngilaq. Kisitsisit eqqortut tassaapput 2 miilionit koruunit.