Naalakkersuisut: Nuummiut qulinik tuttussinnaapput
Sunngiffimmi piniartartut killeqanngitsumik tuttunniarsinnaanikuugaluarlutik maanna quliinnarnik tuttussinnaapput, tassalu Nuup kujataani tallimanik Nuullu avannaatungaani tallimanik.
Mianersortumik piniarnissaq anguniarlugu tuttunniarneq killilersimaarneqalersoq, Aalisarnermut Piniarnermut Nunalerinermulllu Naalakkersuisoqarfiup tusagassiuutinut nalunaarummi allaaseraa.
Taamatut aalajangiineq isumaqatigiissusiornermeersuuvoq, sunngiffimmimi piniartartunut tuttuttassat tallimaannaassasut naalakkersuisoqarfiup siunnerfigisimagaluarpaa.
Tuttulli nerisaqarsinnaassusaat aallaavigalugu amerlanerusunik pisaqarnissaq Pinngortitaleriffimmit kaammattuutigineqaraluarpoq.
Aamma atuaruk Tuttutassat pillugit Naalakkersuisut paatsuugaqartut
Piniarfinni Akia-Maniitsumi Ameralimmilu tuttut siornamut naleqqiullugu ikinnerulersimasut naalakkersuisoqarfiup tusagassiuutinut nalunaarummini ilaatigut tunngavilersuutigaa.
Tuttut amerlanerusut pisarineqarnissaat uumassusilerisunit kissaatigineqaraluarpoq. Piniarfinni Akia-Maniitsmi aamma Ameralimmi tuttunik kisitsinerit ukiut sisamat aamma ukiut arfnillit matuma siorna pipput.
Aqutsiveqarfimmi Nuummi sunngiffimmi pinialuttartut piniarnermut allagartamik akiliinikut ukiormanna 1.053-iupput.
Tuttunniarneq pisarnertut aggustip aallaqqaataani aallartissaaq.
