Naalakkersuisut: EU-p puisinut peqqussutaa sukateriffigineqartariaqanngilaq
Peqqussummut allannguisoqarnissaanut siunnersuut pillugu suli isumaqatigiinniartoqarnera innersuussutigalugu, allannguutissatut siunnersuummut oqaaseqaatit siunnersuummullu allannguutissatut siunnersuutit Aalisarnermut, Piniarnermut Nunalerinermullu Naalakkersuisup Karl-Kristian Krusep itisilerusunngikkallarpai.
Naalakkersuisut tusagassiorfinnut taama nalunaaruteqarput.
EU-lli puisinut peqqussutaata sukateriffigineqartariaqannginnera, Naalakkersuisut aalajangiusimavaat:
- Naalakkersuisut piujuaannartitsineq atorluaanerlu pingaartittorujussuuaat, erseqqissumillu nalunaarutigereerpaat puisit amii piujuaannartitsineq tunngavigalugu atorneqarpata EU-mut eqqunnissaannut sukaterisoqartariaqanngitsoq sakkortunerusumillu inerteqquteqartoqartariaqanngitsoq, Naalakkersuisut tusagassiuutinut nalunaarutaanni ilaatigut allassimavoq.
AAMMA ATUARUK Chemnitz Larsen: EU-p puisinut tunngasunut sukaterinera Naalakkersuisut arajutsivaat?
AAMMA ATUARUK Doris Jakobsen: Puisit amiinik avammut niuernerput EU-p akornuseqqinniarpaa
EU-p Siunnersuisoqatigiivi Parlamentilu puisit amii pillugit isumaqatigiinnialerpata Danmarkip tamanna tamakkiisumik, tassa oqartoqarneratuut 100 procentimik, tapersersorniaraa, Namminersorlutik Oqartussat ilanngullugu nalunaarutigaat.
EU-kommissionip puisinut peqqussutaanut allannguutissatut siunnersuutit ukioq manna kingusinnerpaamik oktobarip 18-ianni aalajangiiffigineqassapput.