KNAPK-p Naalakkersuisussat isumalluarfigigai
Naalakkersuisunngortut Kim Kielsenip taasai siuliminnit nutaartaqartiterneri immikkut isigalugit KNAPK-mi siulittaasup isumalluarfigalugit oqaatigaa.
Namminneq aammalu ilaasortarisamilu toqqaannartumik Naalakkersuisoq Attuumassuteqarfigisassaat nutaaq tassaavoq Aalisarnermut, Piniarnermut Nunalerinermullu Naalakkersuisunngortussaq Karl-Kristian Kruse. Taannalu Henrik Sandgreenip taasilluarnertut isigaa.
- Neriulluarfigisorujussuuarput. Aamma tassaavoq pisunik pissutsinillu qanimut suliassaminut tunngassuteqartunik ilisimasaqarluinnaqqissaartoq, Aalisartut piniartullu kattuffianni siulittaasoq Henrik Sandgreen KNR-mut taama oqarpoq.
Suliassaq siulleq
Naalakkersuisussalli suliassaanni siulliussussatut KNAPK-mit innersuussaq eqqartorneqartuartuuvoq. Tassa aalisarnermut inatsit 1996-mi inatsisinngorneraniit ukiorpassuarni aaqqissuunneqaqqittartoq.
Allannguutit maannamut naammaginagit KNAPK-mi siulittaasup aaqqissuusseqqiffigineqartariaqarsoraa:
- Nunatsinni inuutissarsiutit pingaarnersaat, aalisarnermut inatsisip taassuma piaarnerpaamik naammassineqarnissaa suliarineqarnissaalu, Henrik Sandgreen oqarpoq.
Pisassat amerlanerit kissaatigai
Karl-Kristian Krusep suliassaanut annertuutut inissisimassaaq pisassiisarneq. Maannakkulli pisassiisarnerit aaqqissuunneqartarneri killilersorpallaarneqartarneri, innuttaasunut arlaqartunut kingunipiluttarneranik KNAPK isumaqarpoq. Taamaattumik Naalakkersuisup piaartumik pisasseeqqinnerunissaa KNAPK-p innersuuppaa:
- Sumiiffiit ilaanni inuuniarnikkut aningaasarsiornikkullu periarfissaqanngilluinnartut, piniakkanik killilersuinerujussuup kingunerisaanik, sumiiffiit ilaat immaqa oqartariaqarpugut allaat nunaqarfiit ilai aningaasarsiornikkut unittoortilluinnarneqaqqissaartarput. Taannalu inuiaqatigiittut aammalu inuttut kinaassuseqarnitsinnut nukittuutut ineriartornissatsinnut naalleraalluinnaqqissaarpoq, taamaammat qaangertariaqarparput, Aalisartut piniartullu kattuffiani siulittaasoq Henrik Sandgreen KNR-mut taama oqarpoq.
