Sulisitsisut: Naalakkersuisoqarfiup suleriaaserisai pimoorussinerunngillat

GE-p nalunaarutissamut nutaamut siunnersuut iluarinngilaa, umiarsuarni aqumiut 90 procentiisa, siornatigut 60 procentiugaluartut, Nunatsinni sivikinnerpaamik ukiuni marlunni aalajangersimasumik najugaqarsimanissaat tassani piumasaqaatiginiarneqarmat.

GE naapertorlugu umiarsuaatileqatigiiffiit nunaqavissunik sulisoqarnissartik sapinngisartik tamaat anguniagarereerpaat, piumasaqaatillu sukannernerulersinneqassappata misissuinerit suut tunngavigalugit Naalakkersuisut sukateriniarnersut GE-p paaserusuppaa.

Nunaqavissunimmi sulisussarsinissaq siunissami ajornarnerulertussaavoq, sulisitsisut peqatigiiffiata GE-p pisortaa, Brian Buus Pedersen taama allappoq:

- Piviusormi imaappoq - annertuumik amigaatigineqarlutik sumiiffigisani sulisussat ilinniarsimasut. Ukiunilu tulliuttuni pissutsit suli erloqinarnerulersussaapput, pissutigalugu ullumikkut umiarsuit naalagarpassui soraarninngornissamut anngukkiartortut amerlanerat, Buus Pedersen taama allappoq.

Nalunaarutissap tusarniaassutigineqarnerani akissuteqarnissamut killiliussaq tassaavoq oktobarip 31-at, tusarniaanermilu atortussat nassiunneqartut naapertorlugit aqaguani atuutilersinneqassaaq:

- Tamanna pimoorussilluni sulinerunngilaq, Brian Buus Pedersen taama allappoq.