Naalakkersuisoqarfiup pisortaa isornartorsiuisunik illersuinnginnerartoq
Aalisarnermut piniarnermullu ataatsimiititaliap tallimanngormat aalisarnermut piniarnermullu naalakkersuisoq ataatsimiikkasuaqatigiumammagu, ataatsimiititaliami ilaasortat ilaata pissutaanerarpaa, ulloq taanna naalakkersuisoqarfimmi pisortap isumasioqatigiinnermi saqqummiinermi oqaaserisimasai.
Ataatsimiititaliami ilaasortaq naapertorlugu ataatsimiititaliap paasisorisimavaa, naalakkersuisoqarfimmi pisortap naalakkersuisup aalisarnermut inatsimmi anguniagaanut akerliusumik isorinnittumik oqaaseqarsimanera.
AAMMA ATUARUK Karl-Kristian Krusemik isumasioqatigiinneq matoqqasoq
Taamaattoqarsimanngitsorli naalakkersuisoqarfimmi pisortap Jørgen Isak Olsenip oqaatigaa.
- Naamerluinnaq taama iliunngilanga, pisortaq oqarpoq.
AAMMA ATUARUK Karl Kristian Kruse isumasioqatigiinnissamut takkutinngitsoortoq
Isumasioqatigiinnermi pisortap aalisarnermut inatsisissatut siunnersuummi pingaarnersiukkat saqqummiussimavai. Ilanngullugillu saqqummiussimallugit isumalioqatigiissitap aalisarnerup iluani innersuussutaasa ilai.
Taamaattumik isumaqanngilaq tamanna aalisarnermut inatsimmik isornartorsiuinerusoq.
- Uanga taama isumaqanngilanga, pisortaq oqarpoq.
Isumasioqatigiinnissamulli aggersaanermut sunarpiaq peqqutaasimanersoq pisortap oqaaseqarfigerusunngilaa.
Ataatsimiititaliartaaq tallimanngornermi isumasioqatigiissimaneq pillugu oqaaseqarusunngikkallarpoq, sapaatip akunneranimi matumani ataatsimoorlutik nalunaaruteqassamaaramik.
AAMMA ATUARUK Isumasioqatigiinneq sapaatit akunneranni uani eqqartorneqassasoq