Naalakkersuisoq: Qalerallit MSC-mik siunissami immaqa meqqilersorneqarsinnaassapput
Pinngortitaq pillugu nunarsuaq tamakkerlugu suliniaqatigiiffiup, WWF-ip Nunatsinni qalerallit sinerissap qanittuaniittut nungutaariaannaanerannik aarleqquteqarnerminni, pilersaarutigaat pisisartunut tamanna paasissutissiissutigineqartariaqartoq. Tamatumalu saniatigut qalerallit Nunatsinni pisarineqartartut MSC-mik meqqeqalersinneqarnissaat siunersuutigalugu.
MSC-mik meqqilersuineq ajunngequteqarlunilu ajoquteqarsinnaasoq, Aalisarnermut naalakkersuisoq, Finn Karlsen, Siumut isumaqarpoq, imali siullermik oqarluni.
- Isumaqarpunga tamanna allaqqunneqarsinnaanngitsoq, kisianni misissuilluaqqaarnerup kinguneranik tamanna pisinnaappat pitsaanerpaassaaq. Tunisassiortut pisisartullu tamanna suliassaraat uangut politikerit suliassarinatigu, taamaattoq ikoqqussappata inatsisigut malitassaat suliarisinnaavagut, Aalisarnermut naalakkesuisoq, Finn Karlsen oqarpoq.
Uumasut aalisakkallu nunarsuatsinni assigiinngitsuneersut nungutaalersut allattorsimaffiannut, qalerallit Nunatsinneersut tassunga ilanngunneqarsinnaaneranik, WWF-ip isumaliuteqarsimanerannut pissutaaneruvoq, Nunatsinni qaleralinniarneq eqqarsaatigalugu, biologit inassutaat malinneqarneq ajorneri paasineqarsimammat.
Tamanna allanngortinniarlugu, Aalisarnermut naalakkersuisoq biologinik suleqatiserinnippoq.
- Pinngortitaleriffik peqatigalugu isumaqatigiippugut, sapinngisamik allaannerusumik maanna paasisitsiniaasariaqalerluta eqqortunik tunngaveqarluta. Tassami inuiaat nunarsuatsinniittut allat paasitittariaqaratsigit qalerallit ulorianartorsiortinneqaratsillu nungulinngimmata.
Finn Karlsen isumaqarpoq, MSC-mik meqqilersuineq pitsaaquteqarsinnaasoq aammali sinerissap qanittuani aalisartunut tamanna ajoqusiisinnaasoq oqaatigalugu.
MSC-p pitsaaqutigisinnaasai Finn Karlsenip siullermik ima oqaaseqarfigai.
- MSC-mik atuineq iluaqutaaasussatut oqaatigineqartarpoq aamma oqartoqartarluni aalisartut akigissaartinneqarnerulissasut, taama oqartoqartarnera upperinngilarput aammami maannakkumut suli sunniutaanik takusaqannginnatta.
Aalisarnermut naalakkersuisoq, Finn Karlsen, Siumut taama oqarpoq, MSC-llu ajoqutigisinnaasai ima oqaluttuaralugit.
- MSC-mut ilisimasat taama killeqartigisut naatsorsuutigineqarsinnaavoq aalisartunut sineriassortunut tamanna sunniuteqagaarnavianngitsoq immaqalu ajoqutaaginnarluni, taamaattumik ilisimasat amerlanerusut pigineqalerpata tamanna atuutilersikkutsigu iluaqutaanerussaaq.
Aalisakkat immikkut MSC-mik meqqilersorneqalersinnaaneri, KNAPK-mit tunngavisumik isumaqatigineqarpoq kisiannili immikkut piumasaqarlutik. Tamanna pillugu KNAPK-p pisortaa, Petrus Biilmann ima oqarpoq.
- MSC-mik meqqilersuisoqalernissa KNAPK-mik soqutigaarput, taamaattumik qalerallit sinerissap qanittuaniittut avataaniittullu meqqilersorneqarnissaanut peqataarusuppugut, kisianni sinerissap qanittuaniittut avataaniittullu immikkoortinneqarnissaat isumaqataaffiginerussallutigu. KNAPK-p pisortaa, Petrus Biilmann taama oqarpoq.
