Ulloq kalaallit qaleralinniartarnerannut pingaaruteqartoq

MSC-mik akuersissummik allagartaqalernissaq marsimi ukioq-kingulleq allartinneqarpoq, akuersissullu nunat tamalaat akornanni peqatigiiffiup Marine Stewardship Councilip atasinnaasumik suliarilluakkamillu aalisarnissamut malittarisassai naapertorlugit tunniunneqartarluni.

Kalaallit aalisarnermut nioqqutissiornermullu suliffeqarfiisa kattuffiata Sustainable Fisheries Greenlandip pilersitsiniarneq taanna suliaraa.

SFG-p MSC-mik akuersissummik allagartaq kalaallit suliffeqarfiisa qaleralinnik nunarsuarmut nioqquteqarsinnaanerannut naleqartorujussuussasoq erseqqissarpaa.

- Nioqqutissiat atasinnaasumik aalisarluarnermeersuusullu allagartamit uppernarsarneqarsinnaalerput. Taamaalillutik kalaallit nioqqutissaataat niuffaffinnut akigissaartitsinerpaanut apuuttarnissaat qulakkeerneqarluni, SFG tusagassiutinut allappoq.

Kalaallit raajartaat nipisattaallu MSC-mik allagartamik aamma tunineqarsimapput aammattaaq kalaallit saarullittaat 2015-imi allagartaqarfiulersimallutik.

Aalisarnermut MSC-mik allagartat nunarsuatsinniittut ullumikkut 312-iupput.