Mittarfiup tallineqarnera iluatitsiffiuvoq
- Timmisartut anginerusut tikittalernerat pingaaruteqartorussuusimavoq, taama oqaluttuarpoq savalimmiuni takornariaqarnikkut suliniaqatigiiffimmi Visit Faroe Islandsimi pisortaq Guðrið Højgaard.
Savalimmiuni takornarianit aningaasaat 2010-mi kaaviiartinneqartut 385 million kr-niupput maannalu 600 million kr-nut amerleriarlutik. Tamanna 2020-mi en milliarder koruunninik kaaviaartitaqalernissamut siunniussaqarnermut naapertuuppoq.
- Ingerlalluartorujssuuvoq anguniagassatut siunnissarput malipparput ilami ukiumut ataatsimik siuaqqavugut, Guðrið Højgaard.
Savalimmiuni mittarfik Vagar 1.250 metersut takitigisimasoq 2011-mi 1.799 meterinut tallineqarpoq taamanili timmisartunut ilaasut amerliarnerannik kinguneqarpoq.
Timmisartunut ilaasut siorna 250.287upput mittarfiullu tallineqarnissaa sioqqullugu tassa 2011-mi 203.499ullutik tassalu timmisartunut ilaasut 46.788nik amerliarput.
- Tamanna Savalimmiuni takornariaqarnikkut ajunngitsumik sunniuteqarpoq aamma angalarusussuseqarnermut. Timmisartoqarfimmi Vagarimi pisortaq Jakup Kass oqarpoq.
Aamma atuaruk Mittarfiit takinerusut nunatsinnut iluaqutaassapput
Mittarfiup tallineqarnera kisimi iluaqutigineqanngilaq, timmisartunut akitsuutit appartinneqarput timmisartuutileqatigiiffiullu Atlantic Airwaysip ingerlaarfigisartagai amerlanerulersinniarlugit akikillisaaffigineqarluni tamannalu tamanut iluaqutigineqarpoq.
- Angalangerit akikinnerulerput, isumarpullu naapertorlugu savalimmiuni billitsit akikinnerulerpata, savalimmiormiut amerlanerit nunanut allanut angalasartut amerlanerulissapput aamma takornariat Savalimmiunut tikittartut amerlanerulissapput, Jakup Kass oqarpoq.
Takornariat Savalimmiunut soqutiginnilersimapput mittarfiup talllineqarnera kisimi pineqanngilaq
- Savalimmiunukartoqarneq ajorpoq timmisartoqarfik takuniarlugu, ornitarliuna misigiartorlugu Savalimmiunukartoqartartoq, Guðrið Højgaard oqarpoq.
Savalimmiuni takornariaqarnermut siunnersuisoqatigiit missingersuutaat 2013-imi marloriaatinngortinneqarpoq tamannalu mittarfiup tallineqarnerata kingorna takornariat amerlanerusut tikittalernerannik kinguneqarpoq.
Aamma atuaruk Visit Greenland: Mittarfiit tallineqarnissaannut piffissanngorpoq
- Tamatuma kinguneraa Savalimmiut nunarsuup sinneranut annertunerujussuarmik malunnaatilimmillu nittarsaallutigu savalimmiuni takornariaqarnikkut suliniaqatigiiffimmi Visit Faroe Islandsimi pisortaq Guðrið Højgaard.
