Mittarfiliortiternissamik aalajangiineq danskit naalakkersuisuisa akuliuffigisimannginneraraat
Illoqarfiit sorliit nutaamik anginerusumilluunniit mittarfittaassanersut Inatsisartut namminneerlutik aalajangerpaat.
Danskit naalakkersuisuisa Nuummi Ilulissanilu mittarfiliortiternermut aningaasalersueqataanissaat pillugu Folketingimi pingasunngormat siunersiuisoqarnerani danskit aningaasaqarnermut ministeriat Kristian Jensen (V) taama akissuteqarpoq.
Naalagaaffiup Nuummi Ilulissanilu mittarfiliortiternissamut aningaasalersueqataanissaminik neqerooruteqarneratigut Nunatsinni mittarfiliortiternissaq pillugu aalajangiiniarnermut danskit naalakkersuisuisa akuliussimanerat danskit aningaasaqarnermut ministeriata Kristian Jensenip ilumuunnginnerarpaa.
AAMMA ATUARUK Danskit ministeriat Løkkep mittarfiit pillugit neqoorutaa pillugu nassuiaatinneqassasoq
Kalaallit Airports A/S-illu Nuummi, Ilulissani Qaqortumilu mittarfinnik sanaartornermut ingerlatsinermullu isumaginnittussatut pilersinneqarnissaanik 2015-imi aalajangiisoqarnera Kristian Jensenip ilaatigut innersuussutigaa.
- Akuliulluta oqanngilagut: Mittarfiit ima ittut sanaartussavasi, aamma tassunga inississavasi. Suliaq ingerlareersoq, uagut isitsinni Kalaallit Nunaanni aalajangiiffigineqareersoq, tapersersuinnarparput, siunersiuinermi taama oqarpoq.
Taanna naapertorlugu mittarfiliortiternissaq pillugu inatsisissaq ’teknikkikkut pissutsinik’ inissinneqaannartussanik imaqarpoq.
Naalagaaffik tapersersuisutuinnaq aningaasaleerusuttoq
Enhedslistenip, Socialdemokraatit Inuit Ataqatigiillu Lars Løkke Rasmussenip Nuummi Ilulissanilu mittarfiliornissamut milliardinik aningaasaliinissamik neqerooruteqarnermini piffissamik toqqaasimanera pillugu apeqquteqarput.
Enhedslistenimeersoq Christian Juhl naapertorlugu, mittarfiliortiternissaq pillugu inatsisip naammassillugu suliarineqarnissaa, aamma Qaqortumi, Kangerlussuarmi Narsarsuarmilu mittarfiit siunissami qanoq pineqarnissaannik aalajangiisoqarnissaa, danskit naalakkersuisuisa utaqqisimasariaqaraluarpaat.
Mittarfiliortiternerit pillugit inatsisip aappassaaneerneqarnera pingajussaaneerneqarneralu Inatsisartut ukiaanerani ataatsiminneranni oktobarip 15-iani 22-anilu pissapput.
Danskilli naalakkersuisui naapertorlugit Nuummi Ilulissanilu mittarfiit tassaassapput niuernikkut imminnut napatilluarnerpaasussat. Taamaammat taakku toqqarneqarput - aamma aningaasatigut naalaagaaffimmit iluanaaruteqarfiusussaanngikkaluartut.
- Aamma erseqqissaatigerusuppara Danmarkip mittarfiliortitertoqarneranut annertuumik oqaasissaqaqataanissaa naalakkersuisuinit kissaatigineqanngimmat. Tunngaviatigut tapersersuisutut aningaasaleqataaginnartutullu immitsinnut isigivugut, Kristian Jensen oqarpoq.
Anguniagassatut nalunaarut allanngortinneqarsinnaasoq
Nuummi Ilulissanilu mittarfiliortiternermut danskit naalakkersuisuisa aningaasaleeqataanerat Folketingimi amerlanerussuteqarluartunit tapersersorneqarpoq. Mittarfiliortiternissarlu pillugu inatsisip akuersissutigineqarnissaa Naalakkersuisooqatigiit Demokraatillu marlunngormat isumaqatigiissutigaat.
AAMMA ATUARUK Naalakkersuisooqatigiilersut Demokraatillu mittarfiit pillugit atsioqatigiissuteqartut
Danskilli naalakkersuisuisa siunnersuutaat imaannangilaq allanngortinneqarsinnaanngitsoq. Inatsisartunimi amerlanersussteqartut mittarfiliortiternissamut allaannguteqartitsinissaq toqqassagaluarpassuk, naalagaaffiup neqeroorutini eqqarsaatigeqqikkusussavaa.
- Suliniut Kalaallit Nunaata tungaanit allanngortinneqarluinnassagaluarput, taava soorunami misissoqqinnissaanut periarfissaqarusussaagut. Matumali Kalaallit Nunaanni Naalakkersuisut Inatsisartullu peqatigalugit sukumiisumik oqaluuserineqaqqaartussaanera ataqqilluinnarparput, Kristian Jensen oqarpoq.
