Illuatungiliuttut: Mimi Karlsen suliami Manuminamut tunngasumi akisussaaffimminik tigusisariaqarpoq

Suliaq Manuminamut tunngasoq eqqarsalersitsisariaqartoq Inatsisartunut ilaasortat ilaat isumaqarput. Peqqinnissaqarfiup ajornartorsiutai annertuut maannangaaq iliuuseqarfigineqartariaqarput.

Allattoq Kim Hinrichsen, Paarnannguaq Nielsen

septembarip 20-at 2023 08:02

Manumina arfinilinnik ukioqarluni Dronning Ingridip Napparsimmavissuani sulisunit passunneqarnemini toquvoq.

KNR-imiillu pisup pinnginnerani ingerlanerani aamma kingorna qanoq pisoqarsimanera ulluni kingullerni oqaluttuaraavut.

Peqqissutsimut naalakkersuisoq Mimi Karlsen nipangersimaannarpoq suliamullu tunngatillugu oqaaseqarnissani kissaatiginagu allagaannartigulli akissuteqarpoq.

Politikerilli allat pisoq alianartoq tusareerlugu oqaasissarpassuaqarput.

Aamma atuaruk Manumina DIH-mi toquvoq: Angajoqqaavi misigipput kukkunerpassuaqartoq ilaginnaasoqartorlu

Taakkununngalu ilaavoq Aqqalu Jerimiassen Atassummi siulittaasoq.

-Angajoqqaajusut assorsuaq misiginneqatigaakka sakkortuvoq takusaq, aliasunnarporluunniit tusarnaarlugu ippassaq radioaviisimi toqqaannartumik aallakaatinneqarmat killitsinnartutulluunniit misinnarpoq misigisimasaat sakkortungaarmat, taanna oqarpoq.

Pingaartumik ilaqutariit panimminnik annaasaqartut pillugit Peqqinnissaqarfiup iliuusai Aqqalu Jerimiassenimut mamiatsatsitsipput:

-Taamannak tusaasinnaasanni taamaappalunngilaq taannalu aamma systemikkut sumiginnaaneruvoq toqusoqarsimatillugu arlaannik oqimaattumik nalaataqartut kingunerlutitsissanngippata ingasammik kinguaaqareerpata aamma allanik qaavatigut sulluta artukkeqqissavagut, taanna oqarpoq.

Mimi Karlsen nipangersimaannartoq

Suliamullu tunngatillugu Mimi Karlsen suli apersorneqarusunngilaq.

Taamaammat Aqqalu Jerimiassen akissuteqartitserusulluni qisuariarpoq, soorlu aamma Manuminap angajoqqaavi taama kissaateqaraluartut.

- Pisoq pillugu qisuariannngippat akueriuminaassaqaaq, Naalakkersuisoq akisussaaffimminik tigusisariaqarpoq utoqqatserlunilu, Aqqalu Jeremiassen oqarpoq.

Aamma atuaruk Manuminap angajoqqaavi: Qanoq ajortigisumik pisoqarpat aatsaat qisuariassagamik?

Mimi Karlsennillu sulliamut tunngatillugu akuliunnissaa akisussaaffimmillu tigusisinissaa piffissanngortoq Partii Naleqqami peqqissutsimut oqaaseqartartoq Emanuel Nûko isumaqarpoq:

-Naalakkersuisoq akisussaasoq suliap naammassinissaa tikillugu peqataasariaqarpoq. Tassanilu pisoqarnerani Naalakkersuisoq akisussaasoq suna tamaat qulaajarlugu peqataanissaa kissaatiginarpoq.

Mimi Karlsenip akuliunnissaa pingaaruteqarluinnartoq Emanuel Nûko isumaqarpoq, pisorli alianartoq taannaannaannginneralugu.

-Siusinnerusukkut politikkimi ilaanngikkallarama sineriak tamaat tamakku tusartarnikuuakka. Taamaattumik peqqinnissaqarfipput pitsaanerusumik inuiaqatigiinnut sullissinissaa pisariaqartorujussuuvoq, taanna oqarpoq.

Peqqinnissaqarfik napparsimasoq

Manuminap toqunera peqqinnissaqarfiup annertuumik ajornartorsiuteqarneranut takussutissaasoq, Emanuel Nûko isumaqarpoq. Kukkussutigineqartut sulisussaaleqinerlu piffissami sivisuallaami eqqartorsimavagut. Aaqqiissuuteqarnerli ajortut Naleqqap oqaaseqartartua isumaqarpoq.

-Aqqissuusseqqinnissap tungaanut utaqqissanngilagut maannakkut iliuuseqartoqartariaqarnera pingaarutilerujussuuvoq. Inuiaqatigiit tamarmik peqqissuunissaat qulakkeerusupparput Naleqqaminngaanniit taamaattumik maannakkut iliuuseqartoqarnissaa ilungersuutissavarput, taanna oqarpoq.

Iliuuseqartoqarnissaanut piffissanngortoq, ajornartorsiutillu pimoorunneqarlutillu iliuuseqarfigineqartariaqartut Aqqalu Jerimiassen aamma isumaqarpoq:

-Killiffia malillugu pisussaaffeqarpasileqqavugut maannakkut iliuuseqassalluta ajoraluartumik takoreerparput maannakkumut killiffik.Taannalu qimarratigiinnarsinnaanngilarput massakkuusariaqarpoq pisullu ilungersunarput.

MANUMINAMIK SULIAQ PILLUGU MIMI KARLSENIP AKISSUTAA

Peqqinnissaqarfimmi suliarineqartilluni meeqqap toqunera alianangaarpoq. Peqqissutsimut Naalakkersuisutut aallaavittut peqqinnissaqarfimmi suliani ataasiakkaani pissutsit napparsimasunullu aalajangersimasunut tunngasut oqaaseqarfigisinnaanngilakka.

Peqqinnissaqarfimmi peqqissaanermut tunngatillugu sulisut Nunatsinni Nakorsaaneqarfiup nakkutigisarai. Nunatsinni Nakorsaaneqarfiup aammattaaq Danmarkimi Napparsimasut Maalaaruteqarnerannut Aqutsisoqarfik sinnerlugu napparsimasut maalaarutaat tigoorarlugillu piareersartarpai, tassanngaanniillu suliaq nalilerneqareeraangami peqqinnissaqarfimmi Napparsimasut Maalaarutaannik Aalajangiisartunut ingerlateqqinneqartarpoq. Peqqinnissaqarfiup Napparsimasut Maalaarutaannik Aalajangiisartui, illuatungeriit tamarmik tusarniaavigineqareeraangata maalaarutit pillugit inaarutaasumik aalajangiisarput. Peqqinnissaqarfiup Napparsimasut Maalaarutaannik Aalajangiisartuisa nalilerpassuk, peqqinnissaqarfimmi sulisut suliamut atatillugu nalinginnaasumik iliuusissatut isigineqarlutik akuerisaasut inorlugit iliuuseqarsimasut, kingunerisinnaavai peqqinnissaqarfimmi sulisut maalaaruteqarnermut akuusut assigiinngitsunik sakkortussusilinnik isornartorsiorneqarneri. Tamatuma kingorna Nunatsinni Nakorsaaneqarfiup peqqinnissaqarfimmilu aqutsisut erseqqinnerusumik misissussavaat suliaq peqqinnisaqarfimmi sulisunut akuusunut kinguneqartinneqassanersoq.

Suliami matumani pineqartumi Nunatsinni Nakorsaaneqarfimmut maalaaruteqartoqarpoq, taamaammallu maalaarut maalaaruteqartarnermik aaqqissuussaaneq aqqutigalugu malittarisassat atuuttut naapertorlugit suliarineqarluni. Suliaq suli suliarineqarpoq, taamaammallu suli tunngaviliisoqarsinnaanngilaq, suliami matumani peqqinnissaqarfimmi sulisut suliamut atatillugu nalinginnaasumik iliuusissatut isigineqarlutik akuerisaasut inorlugit iliuuseqarsimanersut.

Peqqinnissaqarfik ataatsimut isigalugu, oqaatigineqarsinnaavoq, Naalakkersuisut peqqinnissaqarfiup iluarsartuuteqqqinnissaa sulissutigimmassuk, peqqinnissaqarfiup patajaallisarneqarnissaa pingaartillugu Peqqinnissarlu pillugu Ataatsimiititaliarsuup inassuteqaatai aallaavigalugit.

Allisiguk