Mimi akuliunnianngilaq
Mimi Karlsenip aamma naqissuserpaa, Namminersorlutik Oqartussat iluanni ingerlatsivinnit allanit KNR ajornerusumik aningaasatigut atugassinneqanngitsoq. Ingerlatsivimmut aningaasaliissutit qanoq atorneqarnissaat KNR-imi qullersat siulersuisullu isumagisassaraat, tamannalu Naalakkersuisunit allanngortilersaarneqanngilaq.
Naalakkersuisulli maluginiarpaat, ukiuni arlaqalersuni KNR-ip ingerlanneqarnerata pissutsinit assigiinngitsunit sunnerneqartarsimanera. KNR-imilu ajornartorsiutaasut siunissaq ungasinnerusoq eqqarsaatigalugu iluarsiissuteqarfiginiarlugit suliaqarneq Naalakkersuisut aallartereerpaat, siunissami aamma nuna tamakkerlugu radiokkut TV-kkullu aallakaatitsisarsinnaanissaq qulakkeerniarlugu.
- Suliaq tamanna KNR-imi siulersuisut qanimut suleqatigalugit pissaaq, taamaammat siunissami KNR-ip ingerlanneqarneranut qanoq aaqqiissuteqartoqarsinnaaneranik siulersuisut naliliinertik naapertorlugu innersuussuteqarnissaat naatsorsuutigaara, Mimi Karlsen allappoq.
KNR-ip ingerlanneqarneranut Naalakkersuisut akuleruterusunnatillu akulerussinnaanngitsut tusagassiuutitigut nalunaarummi oqaatigigaluarlugu, atorfiit atorunnaarsinneqarnerisa kingorna sulisut arfineq pingasut soraarsinneqarnerat, tusagassiuutitigut paasisani pillugu, siulersuisut Naalakkersuisunut paasissutissiisimannginnerat Mimi Karlsen-ip ajuusaarutigaa.