Millionilikkaat Kalaallit Illuinut
Aalborgimi iliuusissaalertussat ilagissavaat ilinniartunik ikiuineq.
- Assorujussuaq uagutsinnut iluaqutaassapput,
Kalaallit illuisa pingasuusut nuuttarnernut tunngasunut suliniutinut assigiinngitsunut katillugit 4 millionit koruuninik qinnuteqarsinnaalerneri pillugit Aalborgimi kalaallit illuanni pisortaq Søren Stach Nielsen oqarpoq.
Aalborgimilu ilinniartut Danmarkimut tikinnerminniit inissilluarnissaannut aningaasat ilaatigut atorneqassapput.
- Tassa Kalaallit Illuanni eqqartornikuuagut kalaallit maanga ilinniariartortartut, ilaatigut imaannaanngitsunik unammillernarsinnaasunik naapitaasaqartarneri, assigiingitsorpassuillu aporfiusarneri. Taamaammat tarnip pissusaanik ilisimasallit suleqatigalugit gruppiliorniarpugut, neriulluta taamaalillutik kalaallit ingerlaqqissinnaasut, Søren Stach Nielsen oqarpoq.
Qallunaat oqaasiinik pikkorissarusunnerminni angerlarsimaffimminngaanniit innuttut ajornartorsiutaasinnaasut nassatarineqarsinnaasarput
- Ilinniartut kisiisa eqqarsaatiginagit aammali kalaallit maani nunaqavissut amerlammata. Taakku aamma inuuniarnerminni unammillernarsinnaasunik naapitaqartarmata, amerlasuullu suliffeqaratik tupinnanngitsumillu unittoortarlutik. Aamma taakku eqqarsaatigalugit gruppiliorniarpugut tarnip pissusaannik ilisimasallik suleqatigalugit, Aalborgimi Kalaallit illuanni pisortaq, Søren Stach Nielsen KNR-imut oqarpoq.
Aalborgimi kalaallit illuini ilinniartunut eqimattap saniatigut tassunga assingusumik angerlarsimaffeqanngitsut nakkutilliisulerlugit eqimattaliorniarput.
Taakkualu saniatigut illumi tassani imminnut tapersersoqatigiinnut aningaasanik ujartuisoqassaaq.
Kalaallit Nunaannit Folketingemi ilaasortat danskit isumaginninnermut ministeriallu isumaqatiginninniareermata Folketingimi aningaasaqarnermut ataatsimiititaliaata aningaasat pineqrtut tunniuppaat.
Kalaallinut ajornartorsiortunut Danmarkimi najugaqartunut suliniutissanut ukioq manna 4 millionit koruunit danksit aningaasanut inatsisaannit immikkoortinneqarput, ukiullu tulliani aamma taama amerlatigisut immikkoortinneqassallutik.
